Саас кэлэн, халлаан сылыйан, таһырдьа дьаарбайарбыт үксээтэ. Уһун кыһыны быһа маҕаһыынтан ыраах тэлэһийбэтэх дьон, харахпытын “хайы тардаат” таһырдьа талаһабыт. Эбиитин, биэстээх сиэммит тымныйан дьиэҕэ олорор. Биир үксүн кинини даҕаны салгын сиэтээри, эмээхсимминиин дьиэбит иннигэр баар былаһааккаттан арахпаппыт. edersaas.ru
Биир үтүө күн өрүү буоларын курдук, аттынааҕы маҕаһыынтан килиэп, оҕолорго минньигэс ас сыыһа атыылаһан кэлэн иһэн көрдөхпүнэ, эмээхсиним кимниин эрэ сэлэһэн ырааппыт. Чугаһаан көрбүтүм, аттынааҕы подъезка дөрүн-дөрүн көстөн ааһар дьахтар эбит. Эмиэ уһуйааҥҥа сылдьар сиэнэ тымныйан, кыыһа ыҥыртаран ылбыт.
Аныгы үйэҕэ ийэлэр больничнайга бараллара да бобуллубут, бадаҕа. Сураҕа, тойотторо-хотуттара сөбүлээбэттэр үһү. Онон хайыа баарай, төлөпүөннээттэрин кытта, хата, чугас эҥээр улууска олорор буолан улаханнык ороскуотурбакка киирбит.
Ол дьахтар кэпсиир ээ, кыыһа икки оҕолоох соҕотох ийэ эбит. Күтүөтэ буолуохсут атын дьахтарга иирэн барбыт үһү. Кырата уһуйаан иитиллээччитэ, улахана оскуолаҕа үөрэнэр эбит. Сыллата саас аайы уһуйаан буоллун, оскуола буоллун өрөмүөҥҥэ диэн түһээн хомуйаллар үһү. Буолаары буолан, уһуйааҥҥа сылдьа да иликтэринэ, били, барыны бары билэр батсаап диэннэригэр бөлөх тэрийбиттэр. “Ити ирдэнэр”, “манна бачча харчы наада” диэн букатын ааҕан-суоттаан ырааппыттар үһү. Уопсайа, балтараа тыһыынчаларын олордон ылбыттар. Күһүн тиийбиттэрин кэннэ, тахсан киирэр кумааҕыларыгар, икки араас салпыаккаларыгар тиийэ тэллэх саҕа испииһэк туттарбыттар. Тэтэрээт, альбом туһунан этэ да барыллыбат үһү. Аны оскуолаҕа эмиэ биир оннук диир. Урут төрөппүттэр тиийэн оҕолоро үөрэнэр кылааһын кырааскалаан, сууйан-сотон эрэ биэрэллэр эбит. Билигин пластик түннүгэр, линолеумугар тиийэ барытын төрөппүттэр уйуналлар үһү. Эмиэ даҕаны харчы хомуйуутун үөһэттэн бобор ааттаахтар… Эбэтэр ити дьахтар тугу эрэ “эбэр” дуу… Онтун быыһыгар күтүөтүн үөҕэн ылар, кэппиэйкэ даҕаны элэмиэн төлөөбөт диир. “Кыыһыҥ соҕотох ийэ быһыытынан төлөөбөппүн диэн кыккыраччы аккаастаннын ээ”, — диэн сүбэлээн көрбүппүн, оҕолорбун кырыы харахтарынан көрүөхтэрэ, кыаммат ыал диэн сэниэхтэрэ диэн санааттан, барахсан саҥата суох биэрэн иһээхтиир үһү.
Арассыыйаҕа үөрэх төлөбүрэ суох дииллэр да, төрөппүттэртэн харчы хомуйар буоллахтарына, ол аата көстүбэт “хомуур” диэн баар буоллаҕа.
Биэтэс БИЛЭЭХЭП, edersaas.ru
Уруһуй интэриниэттэн туһанылынна.