Саас кэлэн, элбэх эр киһи бултуу бараары бэлэмнэнэ сылдьар. Булт маҕаһыыннарыгар бүппэт уочарат, ботуруон маҕаһыыҥҥа тохтоло суох атыыланар. Дьэ, сааскы булт көҥүлүн туһунан этэр буоллахха, быйыл саха сиригэр бултааһын ыам ыйын 6 күнүттэн саҕаланыа, диэн Саха Өрөспүүбүлүкэтин айылҕатын харыстабылын министиэристибэтин пресс-сулууспата биллэрэр.
Бастакынан бултаан Абый, Үөһээ Халыма, Өлөөн уонна Эбээн Бытантай улуустара саҕалыахтара. Кинилэргэ хааска бултааһын ыам ыйын 6-8 күннэригэр буолуо. Оттон ыам ыйын 10-12 күннэригэр Эдьигээҥҥэ, Миирнэйгэ (Айхал уонна Удачнай бултуур сирдэригэр) уонна Орто Халымаҕа хааска бултуохтара. Арыый хойутуу, ыам ыйын 16-18 күннэригэр, Аллайыаха, Дьааҥы уонна Аллараа Халыма олохтоохторо хааска бултаһыахтара. Ыам ыйын 24-26 күннэригэр, Анаабыр, Булун уонна Усуйаана улуустара хаастыахтара.
Оттон Алдан, Амма, Ленскэй, Мэҥэ Хаҥалас, Нам, Нерюнгри, Өлүөхүмэ, Сунтар, Таатта, Томпо, Уус Алдан, Уус Майа, Хаҥалас, Чурапчы уонна Дьокуускай куорат булчуттара ыам ыйын 11-20 күннэригэр куска уонна хааска бултаан тыыннарын таһаарыахтара.
Ыам ыйын 14-23 күннэригэр, Үөһээ Бүлүүгэ, Бүлүүгэ, Горнайга, Кэбээйигэ, Миирнэйгэ (Айхал уонна Удачнай бултуур сирдэрин аахпакка) Ньурбаҕа, Өймөкөөҥҥө бултуур көҥүллэнэр. Муома улууһугар ыам ыйын 16-25 күннэригэр бултуохха сөп.
Ыам ыйын 31 күнүттэн бэс ыйын 6 күнүгэр диэри Абыйга, Үөһээ Халымаҕа, Эдьигээҥҥэ, Өлөөҥҥө, Орто Халымаҕа, уонна Миирнэйгэ (Айхал уонна Удачнай бултуур сирдэригэр) куска бултуур көҥүллэнэр.
Оттон, Булун уонна Аллара Халыма кусчуттара, бэс ыйын 1-7 күннэригэр бултуохтара.
Бүтэһигинэн кустуу киириэхтэрэ Анаабыр, Аллайыаха уонна Усуйаана булчуттара. Кинилэргэ кустуур бэс ыйын 4-10 күннэригэр көҥүллэнэр.
Андыга бултуур Аммаҕа, Үөһээ Бүлүүгэ, Бүлүүгэ, Горнайга, Кэбээйигэ, Мэҥэ Хаҥаласка, Муомаҕа, Намҥа, Өймөкөөҥҥө, Тааттаҕа, Томпоҕо, Уус Алдаҥҥа, Хаҥаласка уонна Чурапчыга бэс ыйын 1-4 күннэригэр көҥүллэнэр. Бэлиэтээн этэр буоллахха, Хаҥалас улууһугар Өлүөнэ өрүскэ эрэ андылыыр көҥүллэнэр. Алааска андыны өлөрөр бобуулаах.
Көтөр кынаттаахха бултуур көҥүлү Дьокуускай куорат 202 микрорайонун 18/2 нүөмэрдээх дьиэтигэр баар Дьокуускайдааҕы айылҕа харыстабылын кэмитиэтиттэн ылыаххытын сөп.
Ыам ыйын 7-16 күннэригэр, Амма, Горнай, Ленскэй уонна Хаҥалас улуустарыттан ураты улуустарга мас көтөрүгэр (Атыыр уларга уонна куртуйахха) бултуур көҥүллэнэр.
Тыатааҕыга бултуур муус устар 23 күнүттэн бэс ыйын 6 күнүгэр диэри бултаһар көҥүллэнэр. Санатан эттэххэ, тыатааҕыны бултаһарга анал квота ылыахтааххын.
«Сааскы булт кэмигэр, куттал суох буолуутун ирдэбилин тутуһуҥ! Уоту сэрэхтээхтик туттуҥ! Саас сир-дойду хатан турар кэмигэр, баһаар барыан сөп«, — диэн Саха Өрөспүүбүлүкэтин айылҕатын харыстабылын министиэристибэтэ сэрэтэр.
Николай Попов, «Саха сирэ» хаһыат, edersaas.ru