Ырыа-тойук, олоҥхо-оһуокай — бу барыта “Сааскы сардаҥа” оҕо айар дьоҕурун сайыннарыытын үс сыллаах кэтээн көрүү бырайыагар көстөр. Бырайыак ааптарынан Сунтаар улууһун Дьаарханнааҕы “Одун” КК салайааччыта Василий Васильев буолар.
edersaas.ru
Үс сыл анараа өттүгэр тоҕус оскуола бу тэрээһиҥҥэ үлэтин саҕалаабыт буоллаҕына, билигин түөрт оскуола, ол иһигэр Кутана, Тойбохой, Бордоҥ уонна Аллыҥа нэһилиэктэрэ хаалан бырайыагы түмүктээтилэр. Тэрээһин көмөтүнэн оҕолор саха фольклорун бары жанрын: олоҥхону, чабырҕаҕы, үгэни, норуот ырыатын, тойугу, оһуокайы уонна үҥкүүнү толору баһылыыр буолаллар. Бу үлэҕэ ааспыт икки сылга ХИФУ профессора Людмила Ефимова сүбэ-соргу буолан улахан көмөлөөх.
Катя Осипова – Кутана оскуолатын үөрэнээччитэ бары өттүнэн дэгиттэр, олоҥхото чобуота, ырыата истиҥэ, оһуокайа кэрэтэ. Кини өссө бу идэтин оскуола кэнниттэн салгыыр баҕа санаалаах. Бордоҥ урукку кэмҥэ фольклорга улаханнык биллибэт буоллаҕына, кэнники кэмҥэ Любовь Петрова салайааччыланыахтарыттан биллэрдик сайыннылар. Гриша Алексеев уонна Сергей Яковлев аҕыйах сыл иһигэр элбэҕи сатыыр буоллубут диэн санааларын үллэстэллэр. Манна бастыҥ уонна айымньылаах уһуйааччы үлэтэ өтө көстөр. Кутанаттан Мария Павловна Афанасьева уонна Розалия Николаевна Никифорова өрөспүүбүлүкэҕэ номнуо биллэр салайааччылар. Бу бырайыак көмөтүнэн оҕолорбутугар элбэх үөрэҕи уонна билиини биэрдибит, сыллата манна бэлэмнэнэн репертуарбыт кэҥээтэ диэн санааларын эттилэр. Үс сыллаах үлэ түмүгүнэн, кыайыылаах аатын Бордоҥ нэһилиэгэ (сал. Любовь Петрова, Юлия Еремеева) ылла. Ону таһынан, Бордоҥтон Джулия Прокопьева, Кристина Петрова, Кутанаттан Катя Осипова, Дьулустаан Давыдов, Тойбохойтон Коля Уаров, Амелия Софронова, Аллыҥаттан Дайаана Сидорова, Юлиан Сидоров сэтинньигэ Мексикаҕа барыыга сүүмэрдэннилэр:. Салгыы бу бырайыагы ааптар Баһылай тоҕус сыллаах кэтээн көрүү оҥорор ыра санаалаах.
Мария КОБЕЛЬЯНОВА — ТУСКУЛААНА, Сунтаар