Ульяна Винокурова: «Бэлитиичэскэй күүстэр бэйэлэрин интэриэстэригэр дьону туһаналлар»

Ааспыт өрөбүлгэ Дьокуускайга “Сомоҕо күүс” түмсүү тэрийиитинэн миитин буолла. Бэрээдэги араҥаччылыыр уорганнар иһитиннэрбиттэринэн, Доҕордоһуу болуоссатыгар ыытыллыбыт тэрээһиҥҥэ 1200 киһи, үксэ эмэн саастаах, кытынна.

Роман ПОПОВ, “Саха сирэ” хаһыат, edersaas.ru

Саҥа тэриллибит түмсүү араатардарын этиилэрин тамаҕыттан иһиттэххэ, аны күһүн уонна эһиил буолар быыбардарга бэлэмнэниини саҕалаабыттар бадахтаах. Үксүлэрэ, уруккуттан тыл этэ үөрүйэх дьон, тэрээһин эрдэттэн биллэриллибит бэбиэскэтиттэн туораан, ньуолбар тылларыгар олордон, мустубут дьоҥҥо бэйэлэрин көрүүлэрин, санааларын соҥнуу сатаатылар.

Тоҕо эбитэ буолла, чуо бу күн халлаан сарсыардаттан былытыран, тыала-кууһа күүһүрэн, биллэ тымныйбыта, киэһэнэн хаардаабыта…

Бары бииргэ, сомоҕолоһон

Ульяна Винокурова, социологическай наука доктора:

—Мин бу миитиҥҥэ сылдьыбатаҕым. Арай “WhatsApp”-ынан тарҕаммыт информацияларга олоҕуран санаабын эттэхпинэ маннык:

Бастакытынан, тэрээһин эрдэттэн биллэриллибит бэбиэскэтэ уларыйбыт. Төрүт Сокуон 9-с ыстатыйатын 1-кы чааһыгар олоҕуран, өрөспүүбүлүкэ баайын-дуолун, тыын суолталаах тэрилтэлэрин атыылааһыны утарыыны өйөөһүҥҥэ дьону мунньан баран, өрөспүүбүлүкэ былааһын утарар ис хоһоонноох уураах ылыммыттар. Онон мустубут дьону, миитиҥҥэ кэлбиттэрин эрэ иһин, үспүкүлээннии быһаарыыны ылыныыга кытыннарбыттар. Оттон ити буоллаҕына охлократия (бэлитиичэскэй күүстэр бэйэлэрин интэриэстэригэр дьон бөлөҕүн туһаныылара) диэн буолар. Саҥа тэриллибит “Сомоҕо күүс” түмсүү салалтата итини сатабыллаахтык туһанна. Уонна ол түмүгэр өрөспүүбүлүкэ туруктаах буолуутугар сэрэхтээх быһыыны-майгыны үөскэтиэн сөптөөх быһаарыыны ылынна. Оттон маннык суолу тутуһар сатамматын бэйэбит ааспыт историябыт кэрэһилиир. Бастакы революционердарбыт уонна бастакы юрист үөрэхтээх дьоммут утарыта турсубут биричиинэлэрэ итиннэ этэ. Өскөтө, иккистэр быраап суолун тутуһары туруорсубут буоллахтарына, анарааҥҥылара, эмиэ дьон бөлөҕүн туһанан, күүс өттүнэн өттөйүүгэ барбыттара. Билигин эмиэ онно салаллыах курдук быһыы-майгы үөскээн эрэриттэн мин дьиксинэбин уонна ону төрдүттэн уларытыахха, история уопутугар олоҕуран дьоммутун-сэргэбитин уонна өрөспүүбүлүкэбит позициятын харыстыыр суолу-ииһи тобулуохтаахпыт диибин. Бары бииргэ. Дьиҥнээхтик сомоҕолоһон.

Иккиһинэн, бу миитин дьон кыһалҕата элбэҕин, онон былаас бары таһымынан дьону-сэргэни кытта аһаҕастык кэпсэтэрэ уолдьаспытын ырылхайдык көрдөрдө. Онон нэһилиэнньэни, араас кыһалҕалаах дьону кытары көрсөн кэпсэтии, быһаарсыы түмүгүнэн, эмиэ араас таһымнаах быһаарыы ылыныллыахтаах.

Роман ПОПОВ, “Саха сирэ” хаһыат, edersaas.ru