Балаҕан ыйын 24 күнүгэр 93 сааһыгар сылдьан, Россия үтүөлээх, Саха Өрөспүүбүлүкэтин норуодунай артыыската, Саха сирин бастакы анал үөрэхтээх хормейстера, талааннаах дирижер, кэрэ киһи Феврония Алексеевна Баишева бу олохтон туораата.
“Саха сирэ” хаһыат эрэдээксийэтин, бары ааҕааччыларын ааттарыттан Феврония Алексеевна дьиэ кэргэнигэр, чугас дьонугар дириҥ кутурҕаммытын биллэрэбит.
Ыспыраапка:
Баишева Феврония Алексеевна 1925 сыллаахха от ыйын 8 күнүгэр САССР Мэҥэ-Хаҥалас улууһун Дьабыл нэһилиэгэр төрөөбүтэ.
Сэттэ кылаастаах оскуоланы бүтэрээт, Дьокуускайдааҕы фельдшерскэй-акушерскай оскуолаҕа киирбитэ эрээри, үөрэҕин төлүүр кыаҕа суох буолан, сотору үөрэҕин тохтоппута.
1941 с. Саха судаарыстыбаннай тыйаатырын муусукаалынай-вокальнай кэлэктиибигэр хор артыыһынан үлэҕэ ылыллыбыта.
1951 с. Москватааҕы П.И.Чайковскай аатынан Судаарыстыбаннай консерватория дирижерскай-хоробуой факультетын ситиһиилээхтик үөрэнэн бүтэрбитэ.
Феврония Баишева Дьокуускайдааҕы муусукаалынай-художественнай училище дирижерскай-хоробуой салаатын биир бастакы төрүттээччитинэн, преподавателинэн буолар, маны сэргэ кини Дьокуускайдааҕы радиокомитет хорун салайбыта. Кини кэлиитинэн, кэлэктиип үйэ аҥара кэриэтэ кэмҥэ чаҕылхай талааннаах уус-уран салайааччыламмыта, бэйэтэ ураты толорор истииллээх буолбута.
Саха национальнай музыкальнай култууратын үтүмэн үгүс ситиһиилэрэ Феврония Баишева аатын кытта ыкса ситимнээхтэр. Кини салалтатынан Саха сирин хоробуой искусствотын дойду киин куоратын Москва олохтоохторо, култуура, искусство деятеллэрэ аан бастаан 1957 сыллаахха билсибиттэрэ, үрдүктүк сыаналаабыттара. Бу ситиһии 1972 уонна 1982 сылларга, Москваҕа Саха сирин Култууратын уонна искусствотын күннэрин кэмигэр, өссө чиҥэтиллэн биэрбитэ.
1956-1961 сс. Москватааҕы консерваторияҕа профессор, хор биллиилээх деятелэ А.В.Преображенскай кылааһыгар квалификациятын үрдэтиммитэ.
Ф.А.Баишева 1965-1987 сс. Саха өрөспүүбүлүкэтээҕи хоробуой уопсастыба солбуллубат бэрэссэдээтэлэ этэ.
Кини Саха араадьыйатыгар-тэлэбиидэнньэтигэр муусука туһунан бэйэтин ааптарыскай биэриилэрин ыытара, “Билии” уопсастыба лектора этэ.
“Бочуот бэлиэтэ” уордьан, “Үлэҕэ килбиэнин иһин” мэтээл кавалера. ССРС телерадиотын туйгуна, САССР Үрдүкү Сэбиэтин Президиумун Бочуотунай грамоталарынан наҕараадаламмыта.
СӨ норуодунай, Россия үтүөлээх артыыската.
Саха сирин бастакы идэтийбит хормейстера Феврония Баишева уонна кини көлүөнэтэ, уоттаах сэрии иннинэ да, сэрии кэннинэ да, тугу да кэрэйбэккэ – бириэмэни, харчыны аахсыбакка, дойдубут, дьоммут туһа диэн, холобур буолардыы хорсуннук үлэлээн-хамсаан кэлбит көлүөнэ буолар.
edersaas.ru