Мин Саха араадьыйатын олус диэн дуоһуйа, киэн тутта уонна сэҥээрэ истэбин. Үгүс биэрии киһи билиитин хаҥатар, ис иһиттэн дириҥ ис хоһоонноох тиэмэлээх буолар. Аны саха ырыата истэргэ кэрэтин! Биир кэмҥэ “наушниктанан” баран, кулгааҕым ыалдьыар диэри истэр идэлэнэ сылдьыбытым.
Араадьыйа хас биирдии суруналыыһын сахалыы саҥаран ыытар биэриитэ, омуннаабакка эттэххэ, олох сүрэҕим ортотунан киирэр. Аны, Саха араадьыйатын үлэһиттэрэ телевидениеҕэ тахсар буоллулар. Бу бэрт интэриэһинэй сонун сүүрээни бэркэ сөбүлүү ылынным. Аҥардас куоластарын эрэ истэр суруналыыстарбытын билигин тэлэбиисэргэ кытта көрөбүт. Инньэ гынан “Саха” НКИХ күнүскү биэриитигэр араадьыйаларым таҕыстахтарына, сиэннэрдиин тэлэбиисэр былдьаһыыта буолар түгэнэ эмиэ баар.
Саха араадьыйатын хара сарсыардаттан халлаан туругуттан саҕалаан истэрбит наһаа үчүгэй. Онон саастаах, дьиэҕэ олорор дьоҥҥо Саха араадьыйата – олохпут аргыһа. Хомойуох иһин, улуустарга бириэмэтин тутуһан, тохтотон кэбиһэллэр. Олох арахсыбакка күнү быһа истиэхпитин баҕарабыт. Ол баҕа санаабыт туолара буоллар!
Саха араадьыйатын бары үлэһиттэригэр: “Аны да үүнэ-сайда, чэчирии туруҥ!” — диэн алгыы хаалабын.
Анна ИЛЬИНА, Мэҥэ Хаҥалас, Майа олохтооҕо.