Саха национальнай оркестрын иһинэн үлэлиир “Кыл Саха” ансаамбыл өрөспүүбүлүкэ таһыгар киэҥник биллэр. Былырыын Иркутскайга “Ердынскай оонньуулар” аан дойдутааҕы VI этнокультурнай бэстибээлгэ баран ситиһиилээхтик кыттан кэлбиттэрэ. Ону сэргэ, бу Евразия үгүс ахсааннаах норуоттарын үгэс буолбут бырааһынньыгар кэрэ кыргыттар куонкурустарыгар саха кыыһа Василена Шарина Гран-прины ылбыта.
Икки сылга биирдэ ыытыллар улахан бэстибээлгэ Саха сирин төрүт үгэстэрин көрдөрбүт «Кыл Сахалар» харах далыгар, болҕомто киинигэр сылдьыбыттара. Ол биир туоһутунан ансаамбыл артыыстара Иркутскай худуоһунньуга Георгий Инешин хартыынатыгар үйэтитиллибиттэрэ буолла.
Георгий Инешин 2018 с. ыам-бэс ыйдарыгар Новосибирскайдааҕы кыраайы үөрэтэр мусуойга “Мистический Байкал” диэн быыстапката буолла. Онно элбэх хартыыналар быыстарыгар саха кэрэ Далбар Хотуттара уонна уолан уолаттара уруһуйдаммыттарын киһи эрэ киэн тутта уонна сөҕө-махтайа көрөр. “Кыл Саха” артыыстара Анна Томская, Руслан Габышев, Вероника Лыткина уонна Артур Семенов улуу Байкалга тиийэн, саха төрүт инструменнарынан оонньуу тураллара ылбычча киһи өйдүү охсубат уобарастарынан бэриллибиттэр.
Быыстапкаҕа худуоһунньук кэнники сылларга кыраасканан суруллубут хартыыналара уонна арт-обьектара туруоруллубуттар. Быыстапка аата да этэрин курдук, худуоһунньугу айар үлэҕэ көҕүлээбит улуу күүһүнэн Байкал кэрэ көстүүтэ, кистэлэҥэ буолбут. Худуоһунньук тугу көрбүтүн судургутук түһэрэн ылбат, уруһуйдарын дьикти уонна ураты уобарастарынан ситэрэн биэрэр. Этэргэ дылы, хартыыналарыгар киһи хараҕар көстүбэт күүстэри иҥэрэр, тыыннааҕымсытар. Ол кистэлэҥин бу сахабыт артыыстара көстөр хартыыналарыгар эмиэ таайа сатыахха сөп…
ЫСПЫРААПКА:
Георгий Инешин
1974 с. Саха сирин Ленскэй к. төрөөбүтэ.
1996 с. Новосибирскайдааҕы судаарыстыбаннай педагогическай университет художественнай-графическай отделениетын бүтэрбитэ.
1998 с. “Энтропия видений” бастакы быыстапката буолбута.
Кини уруһуйдарынан уонтан тахса кинигэ бэчээттэнэн таҕыста.
Надежда ЕГОРОВА, “Саха сирэ” хаһыат, edersaas.ru