Кулун тутар 9-11 күннэригэр Улан-Удэ куоракка буолбут Бурятия баһылыгын бирииһигэр көҥүл тустууга XXIII норуоттар икки ардыларынааҕы турнирга Саха сириттэн 12 бөҕөс кытынна.
Ону сэргэ Арассыыйа сүүмэрдэммит хамаандатыттан Виктор Рассадин (65 кг) уонна Дмитрий Аксенов (57 кг) туһуннулар. Саха тустууга оскуолатын өссө биир иитиллээччитэ – Ньургун Скрябин Белоруссия былааҕынан 61 киилэҕэ диэри ыйааһыҥҥа күрэстэстэ.
Быйылгыттан “А” категорияламмыт Улан-Удэтээҕи турнирга Саха сирин чиэһин Петр уонна Алексей Копыловтар, Арыйаан Тютрин (57 кг), Вячеслав Ефремов, Петр Павлов, Айхаан Антонов (61 кг), Дьулустаан Булатов, Эдуард Григорьев (65 кг), Константин Власов, Герман Устинов, Иван Барашков итиэннэ Тимур Николаев (70 кг) көмүскээтилэр.
Бастакы күн 65 киилэҕэ диэри ыйааһыҥҥа “Александр Медведь” уонна “Дмитрий Коркин” норуоттар икки ардыларынааҕы түһүлгэлэр призердара Эдуард Григорьевпыт утуу-субуу икки монголу — Бегзава Гансуҕу,Тумур Очира Тулганы, салгыы финал аҥарыгар Даши Шарастепановы (Бурятия) кыайталаата итиэннэ түмүк хапсыһыыга көбүөр хаһаайына, Арассыыйа чөмпүйэнээтин призера Баяр Цыреновтыын туһунна. Уолаттар ааспыт күһүн Дьокуускайга тустан тураллар. Онно Григорьев Цыреновы илиилээх-атахтаах оҥорботоҕо. Оттон бу сырыыга бүрээт бөҕөһө дьиэтигэр-уотугар утарылаһааччытыгар биир да очукуону биэрбэтэ – 11:0.
57 киилэлээхтэргэ Арыйаан Тютрин финал аҥарыгар монгол Эрденебат Бехбаярга бэрт кыранан сабырыйтаран, үһүс миэстэни былдьаһыыга Белек-Оол Кужугеты (Тыва) хотто.
Иккис күн сүрүн болҕомто 61 киилэҕэ Европа оонньууларын кыайыылааҕа, Арассыыйа үс төгүллээх чөмпүйүөнэ Александр Богомоев (Бурятия) уонна быйылгы Тахты Кубогын кыайыылааҕа, Белоруссия чөмпүйүөнэ Ньургун Скрябин хапсыһыыларыгар уурулунна. Манна бүрээт уопуттаах бөҕөһө тактикатын тапта: хара ааныттан көмүскэниигэ эрэ үлэлээтэ. Тыҥааһыннаах күөн көрсүү түмүгэр судьуйалар Богомоевы кыайыылааҕынан ааттаатылар — 5:1. Ол оннугар Ньургун боруонса мэтээл иһин хапсыһыыга өссө биир бүрээт тустуугун Юлиан Гергеновы 20:8 ахсаанынан баһыйа тутта.
Биллэрин курдук, Арассыыйа бастакы нүөмэрдэрэ, бу ый бүтүүтэ Болгарияҕа ыытыллар «Дан Колов уонна Никола Петров» турнирга бэлэмнэнэллэринэн, Улан Удэҕэ тустубатылар. Софиятааҕы түһүлгэ түмүгүнэн Каспийскайга буолар Европа чөмпүйэнээтигэр кыттар хамаанда сүүмэрдэниэҕэ, оттон Бурятия түһүлгэтэ муус устар ыйга АХШ-ка ыытыллар аан дойду Кубогар сүүмэрдээһин биир түһүмэҕинэн ааҕыллыаҕа диэн буолар.
Роман Попов, «Саха сирэ» хаһыат, edersaas.ru
Хаартыска: Интэриниэттэн