Саха бааһынайдарын Аграрнай партия салайааччыта Ольга Башмачникова көрүстэ

Саха сириттэн Москваҕа тиийэ сылдьар бааһынай хаһаайыстыбалар баһылыктара бэҕэһээ, кулун тутар 11 күнүгэр, киэһэ Домодедово оройуоҥҥа олорор фермер Александр Черкасов “Вершки и корешки” хаһаайыстыбатыгар ыалдьыттаатылар. Онно саха бааһынайдарын дойду АККОР-ун бэрэсидьиэнин солбуйааччы, Россия Аграрнай партиятын бэрэссэдээтэлэ Ольга Башмачникова көрүстэ.

Хаһаайын Александр Черкасов дэлэгээссийэ дьонугар хаһаайыстыбатын көрдөрбүтүн кэнниттэн итии чэйдээх остуол тула олорон кэпсэттилэр. Мунньахха Москва уобалаһын АККОР-ун бэрэсидьиэнэ Василий Тимофеев кыттыыны ылла. Ольга Владимировна ыраахтан кэлбит ыалдьыттарга партия уонна АККОР чилиэннэрэ буолбуттарын туоһулуур билиэттэри, онтон АККОР үрдүкү наҕараадатын – Мальцев мэтээлин Дүпсүн (Уус Алдан) бааһынайыгар Дмитрий Илларионовка уонна АККОР Бочуотунай суругун Семен Еремеевкэ туттартаата.

Бүгүн Саха сиринээҕи АККОР бэрэсидьиэнэ Александр Артемьев салайааччылаах дэлэгээссийэ Тверьгэ айаннаата. Саха бааһынайдара онно сэрэдэҕэ диэри чулуу үлэлээх хаһаайыстыбаларга сылдьан, уопут атастаһыахтара.

Василий НИКИФОРОВ, «Саха сирэ хаһыат, edersaas.ru