Бу күннэргэ СӨ Дьахталлар сойуустарын лиидэрдэрэ дойду тэбэр сүрэҕэр тиийэн, Арассыыйатааҕы Дьахталлар сойуустарын салайааччыта Екатерина Лахованы кытта көрүстүлэр.
Елена ПОТОЦКАЯ, «Саха сирэ» хаһыат, https://edersaas.ru
Бу иннинэ кинилэр СӨ Бастайааннай бэрэстэбиитэлэстибэтин салалтатын кытта көрсүбүттэрэ.
— Хаҥалас, Чурапчы, Мэҥэ Хаҥалас, Таатта, Уус Алдан, Амма, Усуйаана улуустарыттан “СӨ Дьахталларын сойууһун актыыбын оскуолатыгар” сылдьар 23 дьахтар “Доруобуйаны бөҕөргөтүү” саҥа тосхолун чэрчитинэн “Бэс Чагда” санаторийыгар сынньана сылдьаллар. Доруобуйаны бөҕөргөтүү таһынан, сүрүн сорукпут – Арассыыйа Дьахталларын сойууһун кытта үлэ уопутун атастаһыы, бииргэ үлэлээһиҥҥэ сонун хайысханы тобулуу. Араас улуустартан сылдьар буолан, Екатерина Лахованы кытта көрсүһүүгэ өрөспүүбүлүкэбитин хотуттан соҕуруу улуустарга тиийэ киэҥник арыйан кэпсээтибит. Ол курдук, лиидэр дьахталлар ыытар үлэлэрин сиһилии билиһиннэрэн, аныгы үйэҕэ бары өттүттэн сайдыылаах саха дьахтарын уопсай мэтириэтэ ойууланан таҕыста диэххэ сөп.
Екатерина Лахова СӨ Дьахталларын Сойууһун ыытар үлэтин үрдүктүк сыаналаата уонна бииргэ үлэлээһин чэрчитинэн Арассыыйатааҕы таһымнаах үлэни ыытарга ылсарбытыгар сүбэлээтэ. Ол курдук, Саха сирин дьахталлара быйыл кулун тутар 8 күнүгэр РФ дьахталларыгар анаан ылыллыбыт Национальнай Стратегияны олоххо киллэриигэ турбут соруктары кытта билиһиннэрдэ, — диэн кэпсээтэ СӨ Дьахталларын Сойуустарын салайааччыта Анжелика Андреева.
СӨ Бастайааннай бэрэстэбиитэлистибэтигэр сылдьан, өрөспүүбүлүкэ дьахталлара үлэлэрин билиһиннэрдилэр уонна чаҕылхай талааннарын көрдөрдүлэр. Ханна сылдьыбыт сирдэригэр актыбыыс дьахталлар национальнай көстүүмнэрин кэтэ сылдьан, төрөөбүт дойдуларыгар тапталларын, бэриниилэрин көрдөрдүлэр.
Өссө биир интэриэһинэй көрсүһүү СӨ бастакы бэрэсидьиэнэ Михаил Николаевы кытта буолла. Михаил Ефимович “Арасыыйа дьиэ кэргэнэ” диэн дойду таһымнаах Национальнай уопсастыбаннай кэмитиэти тэрийиини көҕүлээччи быһыытынан саха лиидэр дьахталларын кытта атах тэпсэн олорон, ыытыллар үлэ торумун сүбэлэстэ.
“Дьахтар доруобуйатын бөҕөрөтүү” бырагыраама бастакы сүрэхтэниитэ табылынна.
Актыбыыс лиидэр дьахталлар сынньанарынан эрэ муҥурдаммакка, бииргэ үлэлээһиҥҥэ Арассыыйатааҕы таһымнаах үгүс кэскиллээх былааны торумнаатылар. Холобура, эһиил бу бырагыраама чэрчитинэн СӨ Дьахталларын Сойууһа Белокурихаҕа сынньаныыны тэрийиэҕэ. Онно Ульяновскай уобалас уонна Алтайскай кыраай дьахталларын кытта бииргэ сынньана сытан, үлэ уопутун атастаһыахтара. Онон өрөспүүбүлүкэ үгүс актыбыыс, лиидэр дьахталлара бу бырагыраамаҕа кыттаары, номнуо “уочараккка” суруттаран эрэллэр.
Елена ПОТОЦКАЯ, «Саха сирэ» хаһыат, https://edersaas.ru