Окко киириэх иннинэ, саха киһитин санаатын көнньүөрдэр, эти-сиини чэбдигирдэр ат сүүрдүүтэ, от ыйын 7 күнүгэр Чурапчы улууһун дьаһалтатын бирииһигэр, Одьулуун нэһилиэгин Бөтүгүттэ алааһын ипподромугар ыытылынна. Күөх тумул хоонньулары, томторун саҕалары киһи бөҕө, тимир көлө аттарын кэчигирэтэн “лыык” курдук муһуннулар. Дьон бары “ким уксар”, “хочуоллуугун дуо?” дэһэ-дэһэлэр аалыҥнаһа, сүүрэр аттары одуулаан тула үөмэхтэстилэр. 500 солкуобайга 1 тыһыынчаны, 1 тыһыынчаҕа 5 тыһыынчаны бүктээн угустулар, кыайыа диэн эрэммит аттарыгар туохтарын да харыстаабатылар.
Бу күн Чурапчы, чугас сытар улуус дьоно-сэргэтэ тоҕуоруйан ахан турдулар. Уопсайа сэттэ улуус көмүс туйахтаах сылгылара кэлэннэр биэтэккэ илин-кэлин түһүстүлэр.Ат сүүрдүүтүн кылаабынай судьуйатынан А.А. Капитонов, улуустааҕы ат сүүрдүүтүн хамыыһыйата судьуйанан үлэлээтилэр. Мустубут дьон уопсайа классическай стиллээх 7 сүүрүүнү көрдүлэр.
Ол курдук бастакынан 1000 миэтэрэ уһуҥҥа 9 тыйтан: 1 миэстэ Нам улууһуттан Кэрэл (1.06.12) – жокей И.В. Иванов, тренер С.П. Ядреев; 2 миэстэ Мэҥэ Хаҥалас улууһуттан Совдияна (1.06. 53) – жокей С. Гаврильев, тренер В.А. Игнатьев; 3 миэстэ Амма улууһуттан Порт Артур (1.06.78) – жокей Н. Терентьев, тренер А.А. Баишев.
Иккис сүүрүүгэ 1000 миэтэрэҕэ (кэлии 4 сылгыттан): 1 миэстэ Сунтаар улууһуттан Турбо Дансер (1.04.06) – жокей В. Иванов, тренер К.В. Иванов; 2 миэстэ Амма улууһуттан Гоу Стивен (1.04.25) – жокей Н. Терентьев, тренер А. Баишев; 3 миэстэ – Чурапчы улууһуттан Дилинджер (1.05.22) – жокей А. Куличкин, тренер Д.С. Осипов.
Үһүс 1200 миэтэрэ (9 сиэнчэртэн) сүүрүүгэ: 1 миэстэ Хаҥалас улууһуттан Атамаан (1.28.81) – жокей А.В. Михайлов, тренер Ф.С. Константинов, 2 миэстэ Уус Алдан улууһуттан Сардаана (1.29.28) – тренер В.М. Охлопков; 3 миэстэ Уус Алдан улууһуттан Күндүл (1.29.78) – жокей Н. Тусахов, тренер В.М. Охлопков.
Бу үһүс сүүрүү кэнниттэн Бөтүгүттэҕэ үгэскэ кубулуйбут кыыс сырсыытын күрэҕэ ыытылынна манна уопсайа 6 бөтөс суруттарда. Кинилэртэн куотааччынан СӨ хотугу многоборьеҕа успуорт маастара Алена Луковцева буолла. Ипподром биир эргиирин хара буорунан сүүрэн кууһардылар, түмүккэ Алена ким даҕаны ситтэрбэккэ 50 дюймнаах жк-телевизоры кыбынан дьиэлээтэ. Уолаттар бары бириискэ тигистилэр.
Дьэ төрдүс, дьон-сэргэ өр күүппүт, саамай улахан призовой фондалаах 2400 миэтэрэ сүүрүүгэ 6 ат түстэ: 1 миэстэҕэ иннин кимиэхэ да биэрэ илик Чурапчы улууһун сыспайа Мэйн Кониг (2.42.91) – жокей А.А. Куличкин, тренер Д.С. Осипов, 2 миэстэҕэ Мэҥэ Хаҥалас ааттааҕа Скай Файтер (2.45.57) – жокей Е. Оконешников, тренер В.А. Игнатьев, 3 миэстэҕэ саамай ыраахтан айаннаан кэлбит Үөһээ Бүлүү бэрдэ Корибиан Бой (2.47.19) – жокей А.В. Сторчеус, тренер А.Г. Неустроева.
Бэһис 3200 миэтэрэҕэ Саха сиригэр төрөөбүт 4 сылгы илин-кэлин түһүстэ: 1 миэстэ Чурапчы улууһуттан Тускул (3.54.22) – жокей А.Д. Петров, тренер Д.С. Осипов; 2 миэстэ Мэҥэ Хаҥалас улууһуттан Милан (3.55.32) – жокей В. Петров, тренер В.А. Игнатьев; 3 миэстэ Хаҥалас улууһуттан Толедо (4.15.94).
Алтыс 3200 миэтэрэҕэ 5 сылгыттан: 1 миэстэ Чурапчы улууһуттан Санта Люция (3.46.31) – жокей А. Куличкин, тренер Д.С. Осипов; 2 миэстэ Нам улууһуттан Эдимон (3.51.56) – жокей И.В. Иванов, тренер С.П. Ядреев; 3 миэстэ Үөһээ Бүлүү улууһуттан Белман (3.58.78) – жокей А.В. Сторчеус, тренер А.Г. Неустроева.
Уонна сэттис 4800 миэтэрэҕэ (Саха боруодаларыгар): 1 миэстэ Чурапчы улууһуттан Буойун (6.51.51) – жокей А. Куличкин, тренер Д.С. Осипов; 2 миэстэ Чурапчы улууһун Соловьев нэһилиэгиттэн Шторм (6.56.60) – тренер Г.Янков; 3 миэстэ Хаҥалас улууһуттан Астык (7.16.69) – жокей И.А. Яндреев.
Уопсай түмүккэ Чурапчы улууһа бастаата. Улуус Аҕа баһылыга А.Т. Ноговицын кэлбит ыалдьыттарга, кыттыыны ылбыт сүүрдээччилэргэ, ат сүүрүүтүн федерациятыгар, тэрилтэ салайааччыларыгар, урбаанньыттарга, спонсордарга, Одьулуун нэһилиэгин дьаһалтатыгар, волонтердарга дириҥник махтанна.
Семен ЖЕНДРИНСКЭЙ суруйуута
уонна хаартыскаҕа түһэриилэрэ.