Саха КВН кыайыылаҕа «Куйаар» хамаанда 200 000 солк. наҕараадаланна

Ааптар: 
Бөлөххө киир:

Ыам ыйын 26 күнүгэр “Сэргэлээх уоттара” култуура киинигэр Дьокуускай куорат устудьуоннарын икки ардыларыгар ыытыллар «Саха КВН» оонньууларын төрдүс сезона түмүктэннэ. Оонньууга номнуо уопуттаах, ааттаах-суоллаах «Буойун сахалар», «Куйаар», «Уолаттар», «Саха Даймонд», «Арай биирдэ» хамаандалар кытыннылар.

Хамаандалар үс түһүмэххэ оонньоотулар. Маҥнайгы түһүмэх — “Бэйэни билиһиннэрии”, иккис — “Триатлон”, үһүс түһүмэххэ Саха сирин биллэр көстөр дьонун кытта ырыа аргыстаах «дьиэтээҕи сорудаҕы» көрдөрдүлэр. Бэлиэтээн эттэххэ, хас биирдии хамаанда үрдүк таһымнаахтык бэлэмнэнэн кытыннылар.

Түмүккэ муҥутуур кыайыылах аатын “Куйаар” хамаанда сүктэ уонна 200 тыһыынча солкуобай харчынан бириис ылла. Иккис миэстэ “Уолаттар” (100 тыһыынча солк), үһүс миэстэ “Саха Даймонд” (50 тыһыынча солк.).”Көр күлүүк” анал аатын «Уолаттар» хамаанда оонньооччута Айыына Местникова ылла, ону таһынан «Республика» киинэ тыйаатырыгар биир сылы быһа босхо киинэ көрөр абонемент сүүйдэ. “Көрдөөх көкөт” анал ааты «Буойун сахалар» хамаанда оонньооччутуга Попов Илья буолла. “Көхтөөх кыттааччы” анал аат «Арай биирдэ», төрдүс миэстэни «Буойун сахалар» ыллылар.

Дьүүллүүр сүбэ бэрэссэдээтэлинэн Дьокуускай куорат аҕа баһылыга Айсен Николаев үлэлээтэ. Ону таһынан дьүүллүүр сүбэ састаабыгар олордулар «Саха КВН»-ны төрүттээбит, алта сыл устата салайа сылдьыбыт, Ил Дархан өйөбүлүнэн үлэлиир “Дьулуур” оҕо биир сомоҕо хамсааһынын бэрэссэдээтэлэ Геннадий Охлопков, Саха көрдөрөр-иһитиннэрэр хампаанньатын вице-бэрэсидьиэнэ Олег Марков, Россиятааҕы оскуола оҕолорун хамсааһынын Саха сиринээҕи бэрэссэдээтэлэ Варвара Васильева, Саха КВН устудьуоннар лигаларын бастакы, иккис сезонун ыыппыт, редактордаабыт билигин “Биир Ньыгыл Россия” баартыйа киин ситэриилээх кэмитиэтин сүрүн специалиһа Афанасий Колесов, “Детсат” айар бөлөх салайааччыта Степан Порядин, ХИФУ устудьуоннарын идэлээх сойууһун бэрэссэдээтэлэ Александр Сусоев уонна Дьокуускайдааҕы государственнай тыа хаһаайыстыбатын академиятын идэлээх сойууһун бэрэссэдээтэлэ Трофим Иванов.


Дьүүллүүр сүбэ бэрэссэдээтэлэ, Дьокуускай куорат мэра Айсен Николаев оонньуу кэннэ санаатын үллэһиннэ:

— Түөрт чаас устата бэртээхэй оонньуу буолла. Хамаандалар сылы быһа оонньоон, бүгүн саамай чыпчаалларыгар тахсан, бары олус үчүгэй, күүстээх оонньууну көрдөрдүлэр. Көрөөччүлэр көр-күлүү аргыстаах, интэриэһинэй, тиритиилээх-хорутуулаах оонньууну көрөн астынан, үөрэн-көтөн барбыттара «Саха КВН» сайда турарын туоһута буолар.

Казахстан вайнера Асселина ыалдьыттаата

«Уолаттар» хамаанда «дьиэтээҕи сорудаҕар» Казахстан биллэр вайнера Асселина Сайлаубекова кытынна. Кини Орто Халыматтан төрүттээх, ийэтэ — саха, аҕата — казах.

Асселина интервьютун манна ааҕыҥ:

Казахстан вайнера Саха сириттэн төрүттээх (ВИДЕО)

Анастасия АЛЕКСЕЕВА, edersaas.ru

+1
0
+1
0
+1
0
+1
0
+1
0
+1
0
+1
0