ССРС народнай худуоһунньуга Афанасий Осипов бөөлүүн түүн, 89 сааһыгар, күн сириттэн барбытын туһунан Саха сирин Худуоһунньуктарын сойууһа, СӨ Духуобунаһын академията, курутуйан туран, иһитиннэрдилэр.
Еdersaas.ru
А.Н.Осипов – живопись бөдөҥ маастара, уопсастыбаннай деятель, сүдү айымньыларынан Саха сиригэр эрэ буолбакка, Россияҕа, бүтүн аан дойдуга киэҥник биллибит худуоһунньук. Кини үлэлэрэ СӨ Национальнай художественнай мусуойугар, Судаарыстыбаннай Третьяковскай галереяҕа, Судаарыстыбаннай Нуучча мусуойугар, дойду онтон да атын мусуойдарыгар уонна Россияҕа, кыраныысса таһыгар чааһынай коллекцияларга бааллар.
Дьокуускай куоракка академик А.Н.Осипов Хартыыналарын галереята үлэлиир.
Афанасий Николаевич Осипов – саха норуотун духуобунай лиидэрэ «Саха сирэ» хаһыакка араас кэмнэргэ дириҥ ис хоһоонноох интервьюлара, бэйэтин үгүс ыстатыйалара бэчээттэммиттэрэ. Кини сахалыы тыллаах бэчээти мэлдьи истиҥник өйүүрэ.
«Саха сирэ» хаһыат эрэдээксийэтин кэлэктиибэ Афанасий Николаевич дьиэ кэргэнигэр, чугас дьонугар дириҥ кутурҕанын биллэрэр.
Осипов А.Н. Ыспыраапка
Осипов Афанасий Николаевич
Талааннаах худуоһунньук, живописец, 1956 сылтан Россия Худуоһунньуктарын сойууһун чилиэнэ, ССРС, РСФСР уонна Саха Өрөспүүбүлүкэтин норуодунай худуоһунньуга, И.Е.Репин аатынан РСФСР Судаарыстыбаннай бириэмийэтин лауреата, Россия Художестволарын академиятын дьиҥнээх чилиэнэ, СӨ Духуобунаһын академиятын Бэрэсидьиэнэ, СӨ Бочуоттаах гражданина, Горнай улууһун Ытык киһитэ.
«Саха сирэ» хаһыат, edersaas.ru