Саха сирэ – Бурятия охчуттарын табаарыстыы көрсүһүүлэрэ тэриллиэ

Ааптар: 
Бөлөххө киир:

Орел куоракка оҕунан ытыыга үс күрэхтэһии тэҥинэн ыытыллан түмүктэннэ: Россия чөмпүйэнээтэ, Россия кубога уонна эдэрдэр күрэхтэһиилэрэ. Биһиги охчуттарбыт куһаҕана суохтук кытыннылар. Кубокка блочнай оҕунан ытыыга Михаил Филатов, Асим Павлов, Павел Мартынов састааптаах Саха сирин хамаандата бастакы миэстэни ылла. Евгения Тимофеева классическай оҕунан ытыыга иккис миэстэлэннэ. Оттон чөмпүйэнээккэ – классическай оҕунан ытыыга Розалина Тимофеева, Евгения Тимофеева уонна Кристина Устинова састааптаах хамаандабыт үһүс миэстэни ылары ситистэ. Маны тэҥэ Кристина Устинова биирдиилээн түмүккэ пьедестал үһүс үктэлигэр таҕыста.

Петр Павлов, «Саха сирэ» хаһыат, www.edersaas.ru

Манан сибээстээн бэҕэһээ киэһэ “Полярная звезда” гостиница актовай саалатыгар оҕунан ытыы федерациятын көҕүлээһининэн пресс-конференция тэрилиннэ. Манна СӨ Спорка миниистирэ Георгий Балакшин, Россия оҕунан ытыыга федерациятын президиумун чилиэнэ Александр Ким-Кимэн, өрөспүүбүлүкэ оҕунан ытыыга федерациятын бэрэсэдьиэнэ Нина Шарина кыттыыны ыллылар.
Күрэхтэһии кэмигэр Россия оҕунан ытыыга федерациятын отчуоттуур-быыбардыыр конференциятыгар үһүс болдьоххо федерация президиумун чилиэнинэн талыллыбыт Александр Николаевич Ким-Кимэн, Токиотааҕы-2020 Олимпиада кэнниттэн блочнай оҕунан ытыы олимпийскай көрүҥ быһыытынан киирэрэ былааннаммытын иһитиннэрдэ итиэннэ үлэни билиҥҥиттэн саҕалыырга ыҥырда.

Ону тэҥэ биир үөрүүлээх сонуну, сотору кэминэн Бурятия уонна Саха сирин охчуттарын табаарыстыы көрсүһүүлэрэ тэриллэригэр кэпсэтии барбытын иһитиннэрдэ. Маннык этии буряттартан киирбититтэн сылыктаатахха, билиҥҥи кэмҥэ дойдуга күүстээхтэринэн биллэр ыаллыыларбыт кырдьык, сахалары билинэн ыҥырдахтара. Маны таһынан, Александр Николаевич спорт миниистиригэр туһаайан, бюджекка оҕунан ытыы спордугар үбүлээһини көрөрүгэр эттэ.

Оҕунан ытыы өрөспүүбүлүкэтээҕи федерациятын бэрэсэдьиэнэ Нина Шарина, бу уопсастыбаннай тэрилтэ саҥа састааба айымньылаахтык үлэлииргэ ылсыбытын кэпсээтэ. Кини: “чөмпүйэнээт кэнниттэн ырытыһыы, санаа атастаһыыта ыытыллара хайаан даҕаны наада”, — диэн этиитин сөбүлүү иһиттим. Кини үлэлииргэ баҕалааҕа киһини астыннарар. Салгыы Нина Васильевна, федерация сүрүн сыалынан – 2020 сыллааҕы Олимпийскай оонньууга кыттар спортсмены бэлэмнээһин буолар диэн чопчулаата. Итиэннэ бу күннэргэ Бүлүү бөлөх улуустарынан оҕунан ытыы спордун көҕүлүү барарыгар спорт министиэристибэтэ өйөбүл буоларыгар ыҥырда.

Оттон хамаанда кылаабынай тренерэ Андрей Иксман күрэхтэһии түмүгүн билиһиннэрдэ. Бу күрэхтэһиигэ спорт маастара Владимир Алексеев иитиллээччитэ Алина Андреева Россия спордун маастарын нуорматын толорбутун уонна Евгения Тимофеева, Павел Мартынов өрөспүүбүлүкэ рекордун олохтообуттарын иһитиннэрдэ. Бу күннэргэ Евгения Тимофеева Россия сүүмэрдэммит хамаандатын састаабыгар киирэн Европа чөмпүйэнээтин иннинээҕи үөрэтэр-эрчийэр түмсүүгэ сылдьарын эттэ.

Россия кубогын хамаанданан ытыыга кыайыылааҕа Михаил Филатов бэргэн ытааччы эрэ буолбатах эбит, хайдах кыттыбытын барытын идэтийбит исписэлиис курдук сиһилии ырытан кэпсээтэ. Итинэн, этэргэ дылы, доҕотторо Асим Павловка уонна Павел Мартыновка кэпсииллэригэр тугу даҕаны хаалларбата. Холобур, “саха ньоҕой, онон финалга ньоҕойбутун киллэрэн киирсэн кыайдыбыт” диэбитэ, саалаҕа сэргэхсийиини үөскэттэ. Эбэтэр, “Дьокуускайга Россия оҕунан ытыыга чөмпүйэнээтэ ыытыллыаҕыттан, атын даҕаны регионнарга күрэхтэһиини үрдүк таһымнаахтык тэрийэр буолбуттар. Онно барытыгар Саха сирэ холобур буолар. Өссө хаһан күрэхтэһии ыытаҕыт? Тиийиэ этибит, эккитин, балыккытын астыммыппыт”, — диэбиттэрин тиэртэ. Түмүгэр, “Дохсун” спортивнай комплекс охчуттар дьарыктаналларыгар наһаа табыгастааҕын ыйда. Маны истэн, федерация толорооччу дириэктэрэ Павел Карпов тулуйумуна, 2018 сыллааҕы Россия оҕунан ытыыга чөмпүйэнээтин Дьокуускайга тэрийэн ыытары туруорса сылдьабыт диэн, бүөмчү санаатын таһыгар таһаарда.
Дьэ, ол кэнниттэн, Орел куоракка ыытыллыбыт чөмпүйэнээккэ уонна кубокка ситиһиилээхтик кыттыбыт спортсменнарга, тренердэргэ министиэристибэ грамоталара туттарылыннылар.
Пресс-конференция кэнниттэн федерация салалтата салгыы хаалан, тренердэргэ семинар ыытта, спортсменнары уонна кинилэр төрөппүттэрин кытта сүбэ мунньах тэрийдэ.

Петр ПАВЛОВ, “Саха сирэ”, www.edersaas.ru

Ааптар хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0