“Назарбаев Интеллектуальнай оскуолаларын ситимэ” үөрэх автономнай тэрилтэтин ыҥырыытынан, Ил Түмэн сис кэмитиэтин бэрэссэдээтэлэ Феодосия Габышева “Саҥа көлүөнэ оскуолата” диэн норуоттар икки ардыларынааҕы X научнай-практическай кэмпириэнсийэҕэ кыттан кэллэ. Астанаҕа сырыытын түмүгүнэн суруналыыстары кытта көрүстэ.
Бастатан туран, оҕо оскуола иннинээҕи сааһыттан төрөөбүт култууратыгар, үгэстэригэр үөрэнэрин, иитиллэрин, оскуолаҕа киирэригэр туох, хайдах билиилээх-көрүүлээх киирэрин туһунан улаханнык сэҥээрэллэр эбит. Иккиһинэн, кочевой үөрэхтээһини интэриэһиргээбиттэр. “Биһиги “Көс оҕо саада”, “Көс оскуола” бырайыактарбытын улаханнык сэҥээрдилэр”, — диэн Феодосия Габышева иһитиннэрдэ.
Оттон Саха сирэ кинилэртэн туох уопутун иҥэринэр кыахтааҕый диэн ыйытыыга: “Казахстаҥҥа тиийдэхпинэ өрүү тыа сирин оскуолалара хайдах үлэлии олороллорун, туох саҥаны киллэрбиттэрин ыйыталаһабын. Назарбаев бэйэтин кэмигэр үөрэх систиэмэтин сайыннарар пуонда тэрийбитэ. Уопсайа, 2000-тан тахса оскуолалаахтар, Назарбаев оскуолатын 20 ситимэ үлэлиир. Икки сыллааҕыта Казахстан үөрэҕин миниистирин кытта көрсө сылдьыбытым. Оччолорго кини нормативнай үбүлээһин диэн тугун ыйыталаспыта, кинилэргэ саҥа киирэн эрэр. Англия тылынан үчүгэйдик быһаарсаллар, Назарбаев 2000 сыллар саҥаларыгар туруорбут бэлиитикэтэ систиэмэлээхтик олоххо киирбит. Ол эрээри, бэйэлэрин үгэстэриттэн кыратык тэйэн эрэллэр эбит”, — диэн дьокутаат кылгастык кэпсээтэ.
Кэмпириэнсийэҕэ 20 дойдуттан икки тыһыынчаттан тахса учуонай, эксперт, учуутал, топ-менеджер кыттыбыт. Пленарнай чааһыгар Казахстан Өрөспүүбүлүкэтин үөрэҕин уонна наукатын миниистирэ Ерлан Кенжегалиевич, Назарбаев университетын ректора Шигео Катсу дакылаат оҥорбуттар.
Саха Өрөспүүбүлүкэтэ “Назарбаев Интеллектуальнай оскуолатын ситимин” кытта бииргэ үлэлэһиигэ меморандумҥа илии баттаһар туһунан сүбэлэспиттэр.
Людмила ПОПОВА, “Саха сирэ” хаһыат, edersaas.ru