Хабаровскайга Япония генеральнай консула Масанори Фукусима, Тас сибээскэ уонна норуоттар дьыалаларыгар СӨ миниистирин бастакы солбуйааччы эбээһинэһин толорооччу Владимир Васильев бүгүн суруналыыстары кытары көрүстүлэр. Япония уонна Саха сирэ доҕордоһууларын, бу хайысха чэрчитинэн ыытыллар үлэлэр тустарынан кэпсэттилэр.
Санатар буоллахха, бэҕэһээ Тиксиигэ тыал күүһүнэн үлэлиир уот ыстаансыйата үөрүүлээх быһыыга-майгыга арыллыбыта. Үөрүүлээх тэрээһиҥҥэ анаммыт видеокэмпириэнсийэҕэ генеральнай консул Масанори Фукусима кыттыыны ылбыта. Ыраахтан кэлбит ыалдьыт салгыы Ил Дархан Айсен Николаевы көрсөн Япония уонна Саха сирэ бииргэ үлэлээһиннэрин сүрүн хайысхаларын дьүүллэспиттэрэ.
Бүгүҥҥү көрсүһүүгэ Масанори Фукусима Саха сирэ бырамыысыланнаска, наукаҕа, о.д.а. хайысхаҕа улахан дьоҕурдаах исписэлиистэрдээҕин бэлиэтээтэ. Оттон Япония аан дойду биисинэһигэр улахан уопуттааҕынан, аныгы технологияларынан инники күөҥҥэ сылдьарын эттэ. Итиэннэ бу икки дойдулар ыкса сибээстээх бииргэ үлэлээһиннэрэ улахан суолталааҕын ыйда. Ыраахтан кэлбит ыалдьыт, итини сэргэ, туризмы уонна үөрэх эйгэтин кэскиллээх хайысхаларынан ааттаата. Наука үлэһиттэрин, эдэр исписэлиистэри, устудьуоннары хардарыта атастаһыы кэлэр өттүгэр дьоһун суолталаах буолуоҕун,онон сибээһи дириҥэтэр наадалааҕын бэлиэтээтэ. Манна даҕатан эттэххэ, эһиил Дьокуускайга норуоттар икки ардыларынааҕы форум былааннанар. Доҕордуу сыһыаҥҥа дьоһун хардыылар оҥоһуллаллар.
Мария Васильева (СИА) хаартыскаҕа түһэриитэ.
+1
+1
+1
+1
+1
+1
+1