«Интерфакс-Дальний Восток» иһитиннэрбитинэн, Уһук Илиҥҥи региоҥҥа бүгүҥҥү күҥҥэ 63 ойуур баһаара баара бэлиэтэнэр — Амур, Магадан уобаластарыгар, Хабаровскай кыраайга, Чукоткаҕа уонна Саха сиригэр.
Өрөспүүбүлүкэҕэ 16 улууска баһаары утары ураты эрэсиим олохтоммут, ол – Ньурбаҕа, Мирнэйгэ, Томпоҕо, Ленскэйгэ, Нерюнгрига, Алдаҥҥа, Кэбээйигэ, Аммаҕа, Горнайга, Сунтаарга, Чурапчыга, Уус Алдаҥҥа, Үөһээ Бүлүүгэ, Тааттаҕа уонна Дьокуускай куоракка. Биллэрин курдук, итинник эрэсиим олохтоммут сирдэригэр дьон ойуурга тахсыыта кытаанахтык бобуллар.
РФ Ыксаллаах быһыыга-майгыга министиэристибэтин Саха сиринээҕи управлениетын пресс-сулууспата иһитиннэрбитинэн, Гидрометеосулууспа Саха сиринээҕи управлениетын билгэлээһининэн, бэс ыйын 28-29 күннэригэр Хаҥалас улууһугар уонна киин куорат тулатыгар ураты үрдүк V кылаастаах баһаар куттала күүтүллэр. Горнайга уонна Томпоҕо V кылаастаах баһаар баар.
Оттон Эдьигээҥҥэ, Тааттаҕа, Уус Маайаҕа, Ньурбаҕа, Үөһээ Бүлүүгэ, Бүлүүгэ, Кэбээйигэ, Намҥа, Уус Алдаҥҥа, Мэҥэ Хаҥаласка, Чурапчыга, Аммаҕа, Өлүөхүмэҕэ уонна Нерюнгрига IV кылаастаах баһаардар тураллар.
Мирнэйгэ, Сунтаарга уонна Алдаҥҥа ардах түһэн, баһаар куттала I-III кылааска диэри аччаабыт.
Өскөтүн ойуурга уот турбутун түбэһэ көрдөххүтүнэ, тута Быыһыыр сулууспаҕа, нэһилиэк дьаһалтатыгар эбэтэр ойуур хаһаайыстыбатын тэрилтэтигэр биллэриҥ. Суотабай төлөпүөнтэн – 112 биитэр 101. СӨ Ойуур хаһаайыстыбатын диспетчерскэй сулууспатыгар — 8-4112-44-74-76.
Өйдөөҥ! Баһаартан сэрэхтээх буолуу быраабылаларын кэһии иһин, содулуттан көрөн, буруйдаах киһи административнай биитэр холуобунай эппиэккэ тардыллар.
Биһиги корр., edersaas.ru
Хаартыска: интэриниэттэн.