Быйыл Саха сирэ гаас промышленноһа тэриллибитэ 50 сылын бэлиэтиир. Оччолорго аан дойду историятыгар кырыа кыһыннаах кытаанах усулуобуйалаах хоту сир ирбэт тоҥор магистральнай гаас утаҕа тардыллан, Дьокуускай куорат күөх төлөнүнэн туһанар кыахтаммыта.
Александр ТАРАСОВ, «Саха сирэ» хаһыат, edersaas.ru
Салгыы аан маҥнайгытын хоту сиргэ Өлүөнэ эбэ аннынан гаас утаҕа туоратыллыбыта. Бу ситиһии барыта Саха сирин историятын промышленноһыгар көмүс буукубунан суруллар. Сөҕүмэр улахан үлэни барытын үрдүк таһымнаах газовиктар оҥорбуттара. Билигин 8000 км уһуннаах гаас утаҕын “Сахатранснефтегаз” АУо үлэһиттэрэ түүннэри-күнүстэри көрөн-истэн, кыһыннары-сайыннары өрөмүөннээн, күөх төлөн хас биирдии ыалга киирэрин хааччыйаллар.
50 сыл диэн эмиэ да кылгас, эмиэ даҕаны уһун курдук. Бу кэм устатыгар Саха сирин үгүс олохтооҕо гааһы туһанан дьиэтин-уотун сылытар, аһын-үөлүн астанар кыахтанна. Маныаха хас биирдии нэһилиэккэ гаас ситимэ кэлиитэ хаһан баҕарар улахан үөрүү, өрөгөйдөөһүн буолар. Ону хаартыскаҕа түһэрэн үйэтиппит дьон бааллара чахчы. Итинтэн сиэттэрэн уонна бу бэлиэ даатаны көрсө “Сахатранснефтегаз” АУо гаас ситимэ нэһилиэнньэлээх пууннарга кэлиитин, ситими тардыы үлэтин, уо. д.а бу тиэмэҕэ сыһыаннаах хаартыскаларга куонкурус биллэрдэ.
Айталина Никифорова, «Сахатранснефтегаз” АУо пресс-сулууспатын салайааччы:
— Куонкуруска ким баҕарар кыттыан сөп. Хаартыскалары от ыйын 1 күнүгэр диэри тутабыт. “Саха сиригэр гаас ситимин тардыы историята объективка”, “Газовик аата үрдүктүк иһиллэр” уонна “Күөх төлөн мин дьиэ кэргэммэр” диэн номинациялар бааллар. Кыайыылаахтар анал дипломунан уонна 20 тыһ. солк наҕараадаланыахтара. Кинилэр ааттара Саха сиригэр гаас ситимэ тардыллыбыта 50 сыллаах үбүлүөйүгэр аналлаах тэрээһиҥҥэ биллиэ. Куонкурус балаһыанньатын “Сахатранснефтегаз” АУо AOSTING.ru сайтыгар киирэн сиһилии билсиэххитин сөп.
* * *
Хаартыска матырыйаалларын Дьокуускай куорат (677000), Киров уулусса 18 №-дээх дьиэтэ (“В” блок), 5 мэндиэмэн, 507-с кэбиниэккэ аҕалыаххытын, ыытыаххытын сөп. +7(4112) 46-02-15; +7-924-176-66-45 төлөпүөннэргэ эрийэн билсиэххитин, Nikiforovaak@mail.ru электроннай почтаҕа ыытыаххытын сөп.
Александр ТАРАСОВ, «Саха сирэ» хаһыат, edersaas.ru