Бүгүҥҥүттэн Дьокуускайга “Север. Классика. Бетховен” диэн норуоттар икки ардыларынааҕы куонкурус-бэстибээл саҕаланар.
Татьяна Маркова, «Саха сирэ» хаһыат, https://edersaas.ru/
Тэрийээччилэр – СӨ Култууратын, духуобунай сайдыытын министиэристибэтэ уонна В.А.Босиков аатынан СӨ Муусука Үрдүкү оскуолата.
Куонкурус-бэстибээл уус-уран салайааччытынан СӨ Муусука Үрдүкү оскуолатын тас дойдулары кытта сибээстэһиигэ проректора профессор, дирижер Но Тэ Чол буолар.
Бу, биһиги өрөспүүбүлүкэбит култуурунай олоҕор улахан суолталаах тэрээһиҥҥэ Кытай Норуодунай Өрөспүүбүлүкэтин, Корея Өрөспүүбүлүкэтин уонна Россия бастыҥ мусукааннара, профессордара кытталлар.
Кинилэр олунньу 22-28 күннэригэр, нэдиэлэни быһа, Муусука Үрдүкү оскуолатыгар фортепианоҕа, скрипкаҕа уонна виолончельга норуоттар икки ардыларынааҕы маастар-кылаастары ыытыахтара.
Олунньу 20 күнүгэр Өрөспүүбүлүкэтээҕи Медиа-кииҥҥэ буолбут пресс-конференцияҕа норуоттар икки ардыларынааҕы куонкурус-бэстибээл кыттыылаахтара бэстибээл сыалын-соругун, инники былааннарын уонна, Саха сиригэр аан бастаан үктэммит дьон, бэйэлэрин санааларын, саҥа-сонун сиргэ кэлбит үөрүүлэрин үллэһиннилэр.
Корея Чулвон куоратын улахан дэлэгээссийэтигэр киирсэн, оҕо хора – уолаттар уонна кыргыттар кэлбиттэр. Кинилэр сарсын, олунньу 22 күнүгэр 18 чаастан ХИФУ “Сэргэлээх уоттара” Култуура киинигэр кэнсиэрдиэхтэрэ.
“Север. Классика. Бетховен” норуоттар икки ардыларынааҕы куонкурус-бэстибээли үөрүүлээхтик аһыы олунньу 23 күнүгэр ыытыллыаҕа.
Бу күнтэн куонкурус кыттааччыларын истии саҕаланыаҕа.
Олунньу 24 күнүгэр 17 чаастан 1 N-дээх ДШИ саалатыгар Муусука Үрдүкү оскуолатын устудьуоннарын симфоническай оркестрын кэнсиэрэ буолуоҕа. Солистар – Корея Өрөспүүбүлүкэтиттэн кэлэн үөрэнэ сылдьар устудьуоннар. Дирижер – Павел Васьковскай.
Бу кэнсиэр олунньу 28 күнүгэр 18 чаастан П.Ойуунускай аатынан Саха тыйаатырыгар эмиэ көстүөҕэ. Дирижер — Noh Tae Cheol, Корея Өрөспүүбүлүкэтэ.
Лауреаттары наҕараадалааһын уонна норуоттар икки ардыларынааҕы куонкурус-бэстибээл кыайыылаахтарын кэнсиэрдэрэ Муусука Үрдүкү оскуолатыгар олунньу 25 күнүгэр, субуотаҕа, 15 чаастан саҕаланыаҕа.
Оттон олунньу 1 күнүгэр Муусука Үрдүкү оскуолатын кэнсиэртиир саалатыгар Шеньян консерваториятын (КНР) профессора Wei Jia сольнай кэнсиэрэ (скрипка) муусукаҕа сүгүрүйээччилэри түмүөҕэ.
Ыраахтан кэлбит дьоһуннаах ыалдьыттарбытыгар киэҥ хабааннаах анал култуурунай бырагыраама бэлэмнэннэ.
Татьяна Маркова, «Саха сирэ» хаһыат, https://edersaas.ru/