Биллиилээх уопсастыбаннай диэйэтэл, өрөспүүбүлүкэҕэ спорт, физкультура хамсааһынын тэрийээччи Николай Тарскай төрөөбүт күнүгэр, ыам ыйын 8-гар, кини аатын сүгэр “Туймаада” стадиоҥҥа сайыҥҥы сезону арыйыы, онно баар Николай Николаевич бүүһүгэр тыыннаах сибэккини ууруу үөрүүлээх сиэрэ-туома буолла. Тэрээһиҥҥэ Ил Түмэн бэрэссэдээтэлэ Александр Жирков кыттыыны ылла.
Роман Попов, “Саха сирэ” хаһыат, edersaas.ru
Санатан эттэххэ, Саха Өрөспүүбүлүкэтин Ил Дарханын Ыйааҕынан, 2015 сыл алтынньы 12 күнүгэр Николай Николаевич физкультураны, спорду сайыннарыыга улахан кылаатын билинэн туран, кини аатын үйэтитэр инниттэн “Туймаада” стадиоҥҥа Николай Тарскай аата иҥэриллибитэ. “Азия оҕолоро” норуоттар икки ардыларынааҕы VI Спортивнай оонньуулар иннилэринэ аҕай, 2016 сыл от ыйын 1 күнүгэр, “Туймаада” стадион иннигэр 1955-1959 сс. САССР физкультураҕа уонна спорка кэмитиэтин бэрэссэдээтэлинэн үлэлээбит Николай Тарскай бүүһэ туруоруллубута.
Үөрүүлээх тэрээһиҥҥэ тыл этэригэр Ил Түмэн бэрэссэдээтэлэ Александр Жирков өрөспүүбүлүкэ спортивнай олоҕор саҥа үгэс ууруллубутун, мантан антах Николай Тарскай төрөөбүт күнүгэр сайыҥҥы спортивнай сезон официальнайдык арыллар буолуоҕун эттэ, бу Спорт министиэристибэтин муударай быһаарыыта диэн бэлиэтээн ыйда.
Александр Жирков Спорт министиэристибэтэ быйыл 600-тэн тахса, ол иһигэр норуоттар, регионнар икки ардыларынааҕы, өрөспүүбүлүкэтээҕи күрэхтэһиилэри былааннаан олорорун ахтан туран, олору ситиһиилээхтик тэрийэн ыытарга, спорка саҥа ааттары арыйарга баҕа санаатын тиэртэ.
Спорт миниистирэ Георгий Балакшин былырыын 650 спорт тэрээһинэ ыытыллыбытын, Саха сирин спортсменнара Арассыыйа, Европа, аан дойду чөмпүйэнээттэригэр, олимпийскай, паралимпийскай, сурдлимпийскай оонньууларга 189 мэтээли ылбыттарын, онон уоскуйбакка, саҥаттан саҥа үрдэллэри дабайалларыгар тустаах үлэ барарын эттэ.
“Уус Алдан улууһа” муниципальнай тэриллии баһылыга Алексей Федотов, “Дьокуускай куорат” уокуруктааҕы дьаһалтатын баһылыгын солбуйааччы Георгий Михайлов, Арассыыйа физическэй култууратын, спордун үтүөлээх үлэһитэ, педагогика наукатын дуоктара Валерий Кочнев өрөспүүбүлүкэ салалтатыгар, Спорт министиэристибэтигэр Николай Тарскай аатын үйэтитиигэ ахсаабат кыһамньыларын иһин махтаннылар, Саха сирин спорка ситиһиилэрэ Николай Николаевич аатын кытта ыкса ситимнээхтэрин бэлиэтээтилэр.
Роман Попов, “Саха сирэ” хаһыат, https://edersaas.ru