Саха сирин балетнай оскуолатын иитиллээччилэрэ улуу хореограф Мариус Петипа 200 сылыгар аналлаах фестивалга уонна Гала-кэнсиэргэ кыттан кэллилэр
Быйылгы 2018 сыл Арассыыйаҕа нуучча балетыгар уонна аатырбыт хореограф Мариус Петипаҕа ананар.
Ол курдук, РФ Култууратын министиэристибэтин уонна Большой тыйаатыр өйөбүллэринэн, Москватааҕы судаарыстыбаннай хореография академията кулун тутар 11-13 күннэригэр “Мариус Петипаҕа ананар” диэн Арассыыйа балетнай оскуолаларын фестивалын тэрийэн ыытта. Бу фестиваль “Петипа-200” Норуоттар икки ардыларынааҕы форум чэрчитинэн Москватааҕы үбүлүөйдээх тэрээһиннэр бырагыраамаларыгар киирдэ.
Улуу хореограф айар үлэтэ ХIХ үйэ иккис аҥаарыгар эрэ нуучча уонна аан дойду балетын сайдыытын быһаарбыт буолбатах – “Петипа эпохата” хореографическай искусствоҕа күн бүгүнүгэр диэри күүстээхтик дьайар. “Дочь фараона”, “Пахита”, “Корсар”, “Баядерка”, “Спящая красавица”, “Лебединое озеро”, “Раймонда” о.д.а. аан дойду бөдөҥ, ааттаах-суоллаах балетнай труппаларын репертуардарын сүрүннүүллэр.
“Мариус Петипаҕа ананар” фестиваль чэрчитинэн норуоттар икки ардыларынааҕы II научнай-практическай конференция, маастар-кылаастар, “төгүрүк остуоллар”, араас көрсүһүүлэр, дискуссиялар тэрилиннилэр. Мариус Петипа балетын туһунан саҥа тахсыбыт кинигэ сүрэхтэниитэ буолла.
Үрдүк таһымнаах научнай-практическай конференцияҕа ааттаах-суоллаах профессордары, үрдүк үөрэх кыһаларын ректордарын, норуодунай артыыстары, Россия балетнай оскуолаларын салайааччыларын сэргэ биһиги өрөспүүбүлүкэбититтэн Аксения уонна Наталья Посельскаялар ааттарынан балетнай оскуола (колледж) дириэктэрэ, СӨ үтүөлээх артыыската Дария Дмитриева кытынна, тыл эттэ. Итиэннэ, бу оскуола педагога, СӨ үтүөлээх артыыһа, Суорун Омоллоон аатынан Опера уонна балет тыйаатырын солиһа Ренат Хон, балет сценатын сулустарын кэккэлэригэр киирсэн, фестиваль кыттыылаахтарыгар маастар-кылаас биэрдэ.
Оттон фестиваль кыттыылаахтарын Гала-кэнсиэрэ Большой тыйаатыр саҥа сценатыгар буолла. Улуу хореограф чиэһигэр ыытыллыбыт бу улахан кэнсиэргэ Арассыыйа араас эрэгийиэннэрин 9 бастыҥ балетнай оскуолаларын эдэр талааннара – уопсайа 240-тан тахса киһи кытынна.
Ол курдук, Москватааҕы судаарыстыбаннай хореография академиятын, А.Я.Ваганова аатынан Нуучча балетын академиятын, Новосибирскайдааҕы, Пермьнээҕи судаарыстыбаннай хореографическай училищелар, Борис Эйфман үҥкүүгэ академиятын курдук, дириҥ историялаах, үтүө үгэстэрдээх үөрэх кыһаларын сэргэ биһиги Сахабыт сириттэн Аксения уонна Наталья Посельскаялар ааттарынан Дьокуускайдааҕы балетнай оскуола (колледж) иитиллээччилэрэ бу Гала-кэнсиэргэ кыттыыны ылбыттара үөрдэр уонна киэн туттууну үөскэтэр.
Татьяна МАРКОВА, «Саха сирэ» хаһыат, edersaas.ru