Дьоллоох оҕо саас бырааһынньыга, ама, хайаан «Саха сирин бриллианнара» суох ааһыаҕай?
Бэс ыйын 1 күнүгэр «Күннээх дойду» диэн өрөспүүбүлүкэ талааннаах оҕолорун айар үлэлэрин көрдөрөр түһүлгэлэригэр — Орджоникидзе болуоссатыгар аан дойду киин куораттарын кэнсиэрдиир былаһааккаларыттан көрөөччүлэр дохсун ытыс тыастарын хомуйбут үҥкүү ансаамбыла эмиэ элбэх көрөөччүнү бэйэтин тула түмтэ. Оҕо бырааһынньыгар кэлбит дьон бу күн самаан сайыны уруйдуур «Сайын» диэн үҥкүүнү олус сөбүлүү көрдүлэр. Мэктиэтигэр, бу күн кинилэри кытта чаҕылыччы тыкпыт күн күлүмнүү күллэ, сайыҥҥы сиккиэр тыаллаах салгын сайа илгийдэ.
Араас норуот түмсэн олорор Сахабыт сирин норуоттарын доҕордоһууларын өрө тутар «Уйгурскай» уонна»Тувинскай» үҥкүүлэр өрүү дохсун ытыс тыаһынан доҕуһуолланаллар. Кэрэхсэбиллээҕэ баар, бу үҥкүүнү уолаттар толороллор!
Оттон «Кукла» уонна «Полька» үҥкүүлэр — ансаамбыл визитнэй карточкатынан буоллулар. Дойдуларыгар сылдьар буолан, ансаамбыл саамай кырачаан кыттааччылара, улахан сыанаҕа саҥа тахсан кэнсиэрдииртэн дуоһуйууну ылан эрэр «бриллиантиктар», сотору кэминэн визитнэй карточка буолар «Барбарики» үҥкүүлэринэн эмиэ кыттыыны ыллылар.
Оҕолор кэнсиэр аайы көрөөччүлэрин бииртэн биир саҥа үҥкүүнэн үөрдэллэр. Ол курдук, отонноотоххо оҥоойук туолар дииллэринии, «Күн бытархайа», «Лоскутки», «Олоппостоох үҥкүү», «Хомус» уонна «Дьөһөгөй» курдук үҥкүүлэр ансаамбыл «ыаҕыйатын» толорон биэрдилэр. Биллэн турар, бу үҥкүүлэр оҕолору ситиһии эрэ кынаттыыллара саарбаҕа суох. «Саха сирин бриллианнара» аҥардас былырыыҥҥы ситиһиилэрэ сөҕүмэр! Ол курдук, Москваҕа «Ороһуостуба сулустара» уонна Сочига «Золотая нота» Бүтүн Сойуустааҕы бэстибээл-куонкуруска кыайан, ансаамбыл бэйэтин аатын дорҕоонноохтук ааттаппыта. ситиһиилэрэ билигин да иннигэр. Ол туһугар «бриллианнар» салайааччылара РФ уонна СӨ үтүөлээх артыыһа Афанасий Соловьев уонна СӨ үтүөлээх артыыһа Зоя Соловьева бары сыраларын уонна кыахтарын биэрэн туран үлэлииллэр.
Кэнсиэри көрө олорон киһи: «Кытаатыҥ, бу курдук оҕо сааскытыгар өрүү үөрүү уонна ситиһии көтөллөнөн, бары өттүнэн чаҕылыччы күлүмүрдүү сылдьыҥ дуу, «Саха сирин бриллианнара!» — дии саныыр. Оннук эрэ буоллун!
Елена ПОТОЦКАЯ, «Саха сирэ» хаһыат, https://edersaas.ru