close
podpiska

Саха сирин эдэр учуонайдарын сэбиэтин үлэтэ Россия таhымыгар биhирэннэ...
Кыһа - Олох-дьаһах

Саха сирин эдэр учуонайдарын сэбиэтин үлэтэ Россия таhымыгар биhирэннэ

Муус устар ый 10-12 күннэригэр Красноярск куоракка Ураал, Сибиир, Уhук илин федеральнай уокуруктар эдэр учуонайдарын сэбиэттэрин сийиэhэ ыытылынна.

Сийиэскэ уопсайа Россия 26 регионуттан бэрэстэбиитэллэр, Россия президенин наука, үөрэхтээhин эйгэтигэр сэбиэт иhинэн үлэлиир эдэр учуонайдар сэбиэттэрин түмэр координационнай сэбиэт бэрэссэдээтэлэ Никита МАРЧЕНКОВ кыттыыны ыллылар.

Сийиэс эдэр учуонайдар сэбиэттэрин үлэлэрин билиhиннэрэр, араас хайысхаларынан олоххо киирбит бырайыактары билиhиннэриигэ уопут атастаhыыны тэрийэр, регионнар икки ардыларыгар сибээhи олохтуур сыаллаах ыытылынна.

Бу сийиэскэ Саха сирин эдэр учуонайдарын сэбиэтин үлэтин билиhиннэрэр сыаллаах Нинель Малышева, М.К. Аммосов аатынан ХИФУ эдэр учуонайдарын сэбиэтин бэрэссэдээтэлэ, Саха сирин эдэр учуонайдарын өйүүр научно-образовательнай фонда (НОФМУ) бырабылыанньатын чилиэнэ, филологическай наука кандидата уонна Оксана Лугинова М.К. Аммосов аатынан ХИФУ эдэр учуонайдарын сэбиэтин чилиэнэ кыттыыны ыллылар.

Сийиэс бастакы күнүгэр кыттааччылар бэйэлэрин үлэлэрин-хамнастарын кэпсээтилэр. Саха сирин эдэр учуонайдарын түмэр сэбиэт уонна эдэр учуонайдары өйүүр фонда (НОФМУ) үлэтин Нинель Малышева билиhиннэрдэ.

2012 сыллаахтан эдэр учуонайдар бэйэлэрэ түмсэн, туруорсан тэрийбит фондалара тэриллэн, күн бүгүн республика салалтатын өйөбүлүн ылан таhаарыылаахтык үлэлиир, эдэр учуонайдар сайдалларыгар, научнай үлэлэрин киэҥ эйгэђэ сырдаталларыгар, тарҕаталларыгар төhүү күүс, өйөбүл буолар.

Сийиэс кыттыылаахтара Саха сирин эдэр учуонайдарын өйүүр фонда (НОФМУ) үлэтин, уопутун эдэр учуонайдары кытта үлэлэhэргэ бастыҥ холобур буоларын бэлиэтээтилэр уонна Россия атын регионнарыгар бу уопуту тарҕатарга этии киллэрдилэр.

Маны тэҥэ сийиэс кыттылаахтара Россия научно-технологическай сайдыытын тосхолугар эдэр учуонайдар кыттыыларын дьүүллэстилэр.

Сийиэс түмүгүнэн Россия эдэр учуонайдарын түмэр уопсай базаны, регионнар салалталарын иhинэн үлэлиир эдэр учуонайдар сэбиэттэрин тэрийэргэ этиилэр киирдилэр.

Манна дађатан эттэххэ, Россия президенин наука, үөрэхтээhин эйгэтигэр сэбиэт иhинэн үлэлиир эдэр учуонайдар сэбиэттэрин түмэр координационнай сэбиэт бу ый бүтүүтэ «Science ID» диэн информационно-коммуникационной системаны үлэлэтэрэ күүтүллэр. Бу система научнай тэрээhиннэри, эдэр учуонайдар туhунан сиhилии информацияны түмүөҕэ.

Сийиэс сүрүн тэрээhининэн Ураал, Сибиир, Уhук илин федеральнай уокуруктар эдэр учуонайдарын сэбиэттэрэ бэйэ-бэйэлэрин кытта ыкса үлэлэhэргэ сөбүлэҥ түhэристилэр.

«Саха сирин наука, үөрэх тэрилтэлэрин эдэр учуонайдарын үлэтин өссө күүhүрдүөхпүт, тирээн турар, баар кыhалђалары быhаарарга эдэр учуонайдар бэйэлэрин чинчийиилэринэн, арыйыыларынан көмө буолалларыгар, кылааттарын киллэрэллэригэр үлэлэhиэхпит» — диэн бэлиэтиир Нинель Малышева.

 

#бүгүн: 1
1
0

Сайт матырыйаалларын ааптар көҥүлэ суох ылар бобуллар.