Саха сирин хамаандата хаар, муус оҥоһуктар далааһыннаах түһүлгэлэригэр кыттар
Тэрийээччилэр «Оҕолор хамаандалара» уонна «Дьиэ кэргэн хамаандата» номинацияларга бэйэлэрэ ис сүрэхтэриттэн, ойоҕостон дьарыгырааччыларга күөн күрэс саҕаламмытын туһунан иһитиннэрбиттэр. Онтон «Хаар» уонна «Муус» номинацияларга идэтийэн дьарыктанааччылар хамаандалара күрэхтэһэллэр. Күүстэрин, кыахтарын көрдөрө, сатабылларын сыаналата Москваттан, Иркутскайтан, Пермтэн, Дьокуускайтан, Хабаровскайтан, Японияттан, Белоруссияттан, Латвияттан бастыҥнар мустубуттар.
Атын аан дойдутааҕы бырайыактарга чуолаан хаартан, эбэтэр муустан эрэ оҥоһуктарга маннык хабааннаах күрэстэһиилэр ыытыллаллар. Онон «Волшебный лёд Сибири» бу хаартан уонна муустан оҥоһуктары иккиэннэрин көрдөрөргө аналлаах ураты, соҕотох куонкурус диэн быһаараллар. «Маннык ньыманан, бырайыак үрдүк таһымнаах маастардары түмэр, сатабылы, үөрүйэҕи атастаһарга кыаҕы биэрэр уонна саҥа саҕалыыр скульптордарга тирэх буолар», – диэн тэрийээччилэр бэлиэтииллэрин туһунан News.Ykt.Ru иһитиннэрэр.
Ааспыт сылга «Муус» номинацияҕа Красноярскай хамаандата «Ловец снов» скульптуратынан бастаабыт. Онтон «Хаарга» «Равновесие» үлэлэринэн Саха сирин хамаандата кыайыы өрөгөйүн туппут.