- Бу күннэргэ «Саха сирин киэн туттуута» норуот бириэмийэтин «Тыа сирин чулуу үлэһитэ» номинациятыгар финалистартан биир бастыҥы талар куоластааһын түмүктэннэ.
edersaas.ru
Куоластааһын түмүгүнэн «Тыа сирин чулуу үлэһитэ» номинация биэс финалиһыттан кыайыылааҕынан Амма улууһун олохтооҕо Аграфена Сутакова таҕыста. Кини куоластааһыҥҥа финалист аатын ыларыгар 1198 куоластааҕа (онтон 727 — социальнай ситимнэргэ). Кыайыылааҕы быһаарар киирсиилээх куоластааһыҥҥа 4213 куолас бэриллэн (онтон 426 — социальнай ситимнэргэ), Аграфена Сутакова күрэстэһээччилэрин эрэллээхтик кыайда.
Амма улууһугар олорор 80 саастаах ыанньыксыт билигин да эдэрдэргэ «бэринэр» санаата суох. Төһө да саас ыллар, Аграфена Егоровна таптыыр идэтиттэн арахсыан баҕарбат, сүөһү үлэтигэр күн бүгүнүгэр диэри түбүгүрэ сылдьар. Эдэр ыанньыксыттарга холобур буолар киһи аата-суола да күүстээх — САССР тыатын хаһаайыстыбатын Судаарыстыбаннай бириэмийэтин лауреата, тыа хаһаайыстыбатын үтүөлээх үлэһитэ, Амма улууһун уонна Бөтүҥ нэһилиэгин бочуоттаах олохтооҕо. 2012 с. Кремльгэ Дмитрий Медведев Аграфена Сутаковаҕа “Аҕа дойдуга үтүөлэрин иһин” IV истиэпэннээх уордьаны туттарбыта.
Быйыл бэс ыйыгар 80 сааһын бэлиэтиир үбүлүөйдээх киэһэтигэр Амма улууһун «Бөтүҥ» кэпэрэтиибин ыанньыксыта Аграфена Сутаковаҕа сайылыгар пиэрмэ туттарыгар анаан тыа хаһаайыстыбатын миниистирэ Александр Атласов 3,5 мөл. солк. суумалаах сэртипикээти туттарбыта. Б у маннык үтүөкэннээх ытык кырдьаҕас «Тыа сирин чулуу үлэһитэ» номинация кыайыылааҕа «Саха сирин киэн туттуута» норуот бириэмийэтин хаһаайынынан буолла.
Аграфена Сутаковаттан 50 куолаһынан Павел Тыкынаев хаалла. Кини Өлүөхүмэ улууһунааҕы «Нөлөн» бааһынай хаһаайыстыба баһылыга. Финалга тахсарыгар 1216 куоластааҕа (онтон 459 куолас — социальнай ситимнэргэ). Павел Тыкынаевка кэлин 4168 куолас киирдэ, (онтон 504 куолас — социальнай ситимнэргэ).
Атын финалистар көрдөрүүлэрэ маннык:
Ефросинья Лебедева, Чурапчы улууһунааҕы «Уһун Күөл» ТХПК толорооччу дириэктэрэ. Кини 2087 куолаһы ылла, онтон 483 куолас — социальнай ситимнэргэ;
Аксана Котогорова, Дьокуускай куорат фермерэ 2051 куолаһы хомуйда, онтон 182 куолас — социальнай ситимнэргэ.
Петр Бугаев, Нам улууһун олохтооҕо, бааһынай хаһаайыстыба салайааччыта. Кини 1175 куоластаах, онтон 225 куолас — социальнай ситимнэргэ.
Араас улуустартан уопсай куоластааһыҥҥа 27 киһи кыттыыны ылла. Кыайыылааҕы быһаарар куоластааһыҥҥа уопсайа 13 тыһ. тахса куолас киирдэ.
«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр таба тайаммыт үлэттэн дьоллонор дьону кэмигэр бэлиэтээн көрүү буолар. Кинилэргэ махтал тылларын саамай үлэлэрин үөһүгэр сырыттахтарына этэн үөрдүү.
Сотору кэминэн Саха сирин киэн туттуута» норуот бириэмийэтин атын сонун номинацията биллэриллиэҕэ.
«Саха сирин киэн туттуута» норуот бириэмийэтин генеральнай спонсора — «Көмүлүөк» саха иһитин оҥорор фирма.
Елена ПОТОЦКАЯ, «Саха сирэ» хаһыат, edersaas.ru