Саха сиринээҕи епархия «Первый Якутский» диэн документальнай киинэни уһултаран, оҥорторон бүтэрдэ. Бырайыак ааптара Дьокуускайдааҕы уонна Ленатааҕы архиепископ Роман буолар. Режиссер Светлана Сивцева, продюсер Анжелика Тупицына. Киинэ уһуна 22 мүн.
Документальнай киинэҕэ Саха сирин бастакы архиерера Дионисий Хитров туһунан ойууланар. Кини Москватааҕы Иннокентий Вениаминов митрополит үөрэнээччитэ буолар. Киинэни сыл аҥара уһуллулар. Быйыл Саха сиринээҕи епархия РФ Президенин уонна Дьокуускай куорат мэрин граннарын ылан, ол үбүнэн киинэ күн сирин көрөн эрэр.
Режиссер Светлана Сивцева: «Документальнай киинэ Дьокуускай куорат олохтоохторугар эһиил тохсунньу 7 күнүгэр киэҥ экраҥҥа тахсыаҕа. Олохтоохтор босхо көрүөхтэрэ», – диэн эттэ. Билигин ханнык театрга тахсыахтааҕа быһаарылла сылдьар. Былырыын «Якутии небесный покровитель» диэн маннык хабааннаах киинэ «Ленакинотеатрыгар» көрдөрүллүбүтэ.
Хаартыскаларга: киинэни устуу кадрдара.