Саха сириттэн WorldSkills уонна JuniorSkills финалыгар 32 оҕо кыттар

Ааптар: 
Бөлөххө киир:

Бэҕэһээ, ыам ыйын 15 күнүгэр, Краснодар куоракка “Эдэр профессионаллар” (Worldskills Russia) V Национальнай чемпионат үөрүүлээх арыллыыта буолла. Манна Саха сириттэн уопсайа 32 оҕо кыттар.

Людмила ПОПОВА, “Саха сирэ” хаһыат, edersaas.ru


JuniorSkills финалыгар Саха сирин көмүскүүр оҕолор экспердэри кытта

Санатан эттэххэ, улахан чөмпүйэнээккэ сүүмэрдээһин быйыл саас алта блогунан Россия 7 субъегар барбыта. Ол курдук, “Творчество уонна дизайн” блок Москва куоракка, “Тутуу эйгэтэ” Москва уобалаһыгар, “Өҥө эйгэтэ” Саха өрөспүүбүлүкэтигэр, “IT эйгэтэ” Татарстан өрөспүүбүлүкэтигэр, “Промышленнай оҥорон таһаарыы” Чувашия өрөспүүбүлүкэтигэр уонна Хабаровскай кыраайга, “Гражданскай тырааныспары хааччыйыы” Ульяновскай уобаласка буолбуттара.
WorldSkills Russia финалыгар Саха сирин орто үөрэҕин кыһаларыттан 21 ыччат хас биирдиитэ тус-туспа компетенцияларынан кыттар. Тэрийээччилэр иһитиннэрэллэринэн, тустаах күрэхтэһиигэ уопсайа 110 компетенция киирэр эбит. Кинилэр быйыл саас ыытыллыбыт сүүмэрдиир күрэхтэһии түмүгүнэн талыллыбыттара.

Чөмпүйэнээт саҕаланна!

Оттон JuniorSkills III национальнай чөмпүйэнээт финалыгар эмиэ улахан күрэхтэһиини ааһан, 11 оҕо кыттар чиэскэ тиксибитэ. Манна Россия уонна Белоруссия, Голландия, Нидерланды, Швейцария 303 регионуттан оҕолор 19 компетенцияҕа сатабылларын көрдөрүөхтэрэ. Биһиги оҕолорбут аэрокосмическай инженерия, химия анаалыһа, мультимедийнай журналистика итиэннэ кулинарнай, хоруобуйа (кровельнай) дьыалата диэн компетенцияларга кыттыахтара.
Быйылгы чөмпүйэнээккэ хаһааҥҥытааҕар даҕаны элбэх киһи кыттар диэн тэрийээччилэр бэлиэтииллэр. Саха сирин аатын көмүскүү тиийбит оҕолорбутугар ситиһиилэри баҕарабыт.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0