Саха циркэтигэр Марфа уонна Сергей Расторгуевтар ааттара иҥэрилиннэ!
Кулун тутар 31-муус устар 3 күннэригэр Дьокуускайга “Арктика цирковой искусствотын сайдыытын кэскилэ” III Норуоттар икки ардыларынааҕы цирковой искусство форума ыытылынна.
Татьяна Маркова, «Саха сирэ» хаһыат, https://edersaas.ru/
Форум ыалдьыттарынан уонна кыттыылаахтарынан аан дойдуга аатырар Москватааҕы Никулин циркэтин кэлэктиибэ буолла.
Улахан тэрээһин чэрчитинэн Саха циркэтин салгыы сайдыытын боппуруостарыгар “төгүрүк остуол”, артыыстарга маастар-кылаастар ыытылыннылар. Бастыҥ кэлэктииптэри көрүү буолла.
Бу, РФ уонна СӨ үтүөлээх, Саха Өрөспүүбүлүкэтин норуодунай артыыһа Марфа Петровна Колесова-Расторгуева сырдык аатын ахтар-саныыр умнуллубат күннэргэ, Саха циркэтигэр кини мусуой-хоһо аһылынна.
Оттон Саха Өрөспүүбүлүкэтин Ил Дарханын муус устар 3 күнүнээҕи Ыйааҕынан, РФ уонна СӨ үтүөлээх, Саха Өрөспүүбүлүкэтин норуодунай артыыһа Марфа Петровна Колесова-Расторгуева аатын үйэтитэр туһуттан, итиэннэ, РФ уонна СӨ үтүөлээх артыыһа Сергей Васильевич Расторгуев Саха Өрөспүүбүлүкэтин цирковой искусствотын тэрийиигэ уонна сайыннарыыга үтүөлэрин билинэн туран, Саха Өрөспүүбүлүкэтин Судаарыстыбаннай циркэтигэр Марфа Петровна Расторгуева уонна Сергей Васильевич Расторгуев ааттара иҥэрилиннэ.
Татьяна Маркова.