Саха тутар этэрээттэрэ Чайыҥдаҕа үлэлиэхтэрэ

Ааптар: 
Бөлөххө киир:

Бүтүн Арассыыйа таһымнаах устудьуоннар тутуулара — Саха Өрөспүүбүлүкэтигэр.

Николай Попов, «Саха Сирэ» хаһыат edersaas.ru

Ыам ыйын 25 күнүгэр Саха Өрөспүүбүлүкэтин ыччат уонна дьиэ кэргэн политикатыгар миниистири бастакы солбуйааччы Василина Лукина уонна Арассыыйатааҕы устудьуоннар этэрээттэрин киин штабын салайааччыта Михаил Киселев көрсөн кэпсэттилэр. Кэпсэтии түмүгүнэн,  Бүтүн Арассыыйатааҕы устудьуоннар «Север» диэн этэрээттэрин тутуулара аан маҥнайгытын Саха Өрөспүүбүлүкэтигэр ыытыллара быһаарылынна. Тутуу «ГазАртСтрой» ХЭУо хампаанньа Ленскэй оройуон Чайыҥдатааҕы гаастаах сиригэр ыытыллар. Уопсайа 360 байыас Бүтүн  Арассыыйа тутар этэрээттэриттэн мустан үлэлиэ. Сотору кэминэн тутар этэрээттэр истэригэр куонкурус биллэриллиэ. Куонкуруһу кыайбыт, ол эбэтэр, квотаҕа хапсыбыт эрэ этэрээттэр тутууга үлэлиир бырааптаныахтара. Биһиги өрөспүүбүлүкэбитигэр билигин бу этэрээти хомуйаллар. Бырайыак туһунан сиһилии Өрөспүүбүлүкэтээҕи штаб салайааччыта Николай Тарасов билиһиннэрдэ:

—Быйыл аан маҥнайгытын Саха Өрөспүүбүлүкэтигэр бүтүн Арассыыйатааҕы устудьуоннар тутуулара ыытыллар бырайыага олоххо киирдэ. Тутар этэрээттэр Арассыыйатааҕы киин штабтарын салайааччыта, Михаил Киселев «ГазАртСтрой» ХЭУо хампаанньаны кытта кэпсэтии ыытан, Ленскай оройуон Чайыҥдатааҕы гаастаах сиригэр устудьуоннар тутар этэрээттэрин үлэлэтэри сөбүлэстэ. Саха Өрөспүүбүлүкэтигэр тутуу барарынан сиэттэрэн, тутар этэрээттэр байыастарынан үксэ Саха Өрөспүүбүлүкэтин устудьуоннара буолуохтара. Билигин сүүмэрдиир кииннэр Дьокуускай уонна Москуба куораттарга үлэни саҕалаатылар. Ону таһынан, ирдэбил быһыытынан уопуттаах хамандыыры уонна комиссары бэлэмниэхтээхпит. Ленскэй уонна Мирнэй куораттар бэйэлэрэ сүүмэрдээн байыастары ыыталларын туруорса сылдьабыт. Хамнас аччаабыта 25 тыһыынча солкуобай буолуоҕа,  былааны таһынан үлэ хаачыстыбата үрдээтэҕинэ, эбии үп көрүллэн 60 тыһыынча солкуобайга кытары тиийиэн сөп. Урукку сыллары ылан көрдөххө, саха устудьуоннара куруутун үрдүк хамнаска сылдьыбыттара, бэйэлэрин үчүгэй үлэһиттэринэн көрдөрбүттэрэ.

Николай Попов, «Саха Сирэ» хаһыат edersaas.ru

+1
0
+1
0
+1
0
+1
0
+1
0
+1
0
+1
0