Саха сиригэр саха тыла инникилээҕин кэрэһилиир «Саха тыла – кэскиллээх” аахсыйа саҕаланна. Бырайыагы тэрийээччилэр өрөспүүбүлүкэ олохтоохторун сахалыы хоһоон эбэтэр ырыа толорууларын видеоҕа устан, Instagram социальнай ситимҥэ ыытарга ыҥыраллар.
edersaas.ru
Ырыаһыт Сильверсан бу көҕүлээһинин биир идэлээхтэрэ – култуура үлэһиттэрэ уонна айар дьон өйөөтүлэр. “Саха тыла – кэскиллээх” бырайыак продюсера – суруналыыс, бэйиэт, Арассыыйа Суруйааччыларын сойууһун чилиэнэ Яна Байгожаева.
— Айал Сильверсан көҕүлээһинин мин сэргээбитим. Онон, устууну саҕалаабыппыт. Биһигини «Сахамедиа» генеральнай дириэктэрин бастакы солбуйааччы Афанасий Ноев улаханнык өйөөтө.Төрөөбүт тылы билии уонна баһылааһын киһи духуобунай эйгэтин баай, сырдык оҥорор дии саныыбын. Саха сирин олохтоохторо көхтөөхтүк кытталларыгар эрэнэбит. Оччоҕо бырайыагы өссө кэҥэтэн, өссө интэриэһинэй оҥоруохпут», – диэн Яна Байгожаева инникитин маннык аахсыйаны атын норуоттар бэрэстэбиитэллэригэр ыытар баҕалаахтарын иһитиннэрдэ.
Аахсыйаҕа артыыстар Айал Сильверсан, Зинаида Колодезникова, Сахая, Алиса Саввинова, Альбина Дегтярева, Варя Аманатова, бэйиэттэр Иван Мигалкин, Яна Байгожаева, Зинаида Архипова, Рустам Каженкин, Лиза Мигалкина, Марина Платонова, тэрилтэлэр салайааччылара, уопсастыбанньыктар Алла Ноговицына, Татьяна Варфоломеева, Афанасий Ноев кытыннылар.
«Саха тыла кэскиллээх» аахсыйаҕа кыттарга бэйэҥ эбэтэр атын ааптар хоһоонун ааҕыахха эбэтэр ырыатын ыллыахха сөп. Атырдьах ыйын 21 күнүгэр диэри Instagram ситимҥэ «СахаТылаКэскиллээх» диэн хэштегтээх угуҥ. @iliveinyakutia бырайыак страницатыгар суруйтарыҥ уонна быһаарыылары (комментарийдары) суруйуҥ.
Түмүктэр атырдьах ыйын 31 күнүгэр биллиэхтэрэ. Бастыҥ ааҕааччылары сыаналаах бириистэр, оттон ырыа куонкуруһун кыайыылааҕын «Добун» устуудьуйаҕа уһуллар сэртипикээт күүтэр. Сиһилии@iliveinyakutia аккауҥҥа билсиҥ.
Надежда ЕГОРОВА,“Саха сирэ” хаһыат, edersaas.ru