Саха уолаттара Кыайыы параадыгар кыттыахтара

Бөлөххө киир:

Соторутааҕыта саха уола дойдубут тэбэр сүрэҕэр Кыһыл болуоссакка Кыайыы параадыгар кыттар үһү диэн сурах өрөспүүбүлүкэни тилийэ көппүтэ. Бу кырдьык дуо?
Ангелина Васильева, “Саха сирэ” хаһыат, edersaas.ru

Биллэрин курдук, Кыайыы параадыгар кыттыы – улахан чиэс. Дойду кыаҕын, күүһүн көрдөрөр сүдү тэрээһиҥҥэ талыллыбыттартан талыллыбыттар, бастыҥтан бастыҥнар кытталлар. Холобур, Москваҕа 1945 сыллаах Кыайыы параадыгар Саха сириттэн уоттаах сэрии кыргыһыытын ааспыт, Сталинград, Ленинград, Курскай Дуга мэһийиитин туораабыт, Берлиҥҥэ тиийбит буойуннартан 14 киһи кыттыбыта биллэр. Олор истэригэр аатырбыт снайпер, Сэбиэскэй Сойуус Дьоруойа Федор Охлопков баара.
Нам Арбынын уола Марк Колесов генерал В. Ф. Маргелов аатынан Суворов уордьаннаах Рязаннааҕы салгын-десантнай (ВДВ) училищеҕа үөрэнэ сылдьар. Бу РФ Оборона министиэристибэтин байыаннай үөрэҕин кыһата. Судаарыстыба сакааһынан салайар каадырдары, разведчиктары, техниктэри, о.д.а. бэлэмниир.

Бу күннэргэ Марк бииргэ төрөөбүт убайа Станислав Колесовы булан, кэпсэттибит.
Быраатым кыра эрдэҕиттэн байыаннай буолуон баҕарар этэ. 9-с кылаас кэнниттэн ханна үөрэнэ барарын быһаарыммыта, сыал туруорунан, эт-хаан өттүнэн анаан бэлэмнэммитэ.
Икки сыллааҕыта оскуоланы бүтэрэн, Рязань куоракка баран, эксээмэннэри туттарбыта, тургутугу ааспыта. Иккиэн бара сылдьыбыппыт. Кини барытын этэҥҥэ туттаран, онно хаалбыта. Быйыл иккис кууруһун бүтэрэн эрэр. Эһиил үөрэҕин бүтэрэр, ол кэнниттэн үрдэтинэр, уопсайынан, былаана киэҥ.
Кыайыы параадыгар кытталлара тохсунньу ыйтан биллибитэ. Ол гынан баран, сорохторун сыыйан кэбиспиттэр этэ. Ити курдук, хас да сыыйыыны ааһан, кини кыттар буолла. Марк үрдүк уҥуохтаах, эт-хаан өттүнэн үчүгэй бэлэмнээх, үөрэҕин да кыайа-хото тутар. Кинилэр Рязаннааҕы салгын-десантнай сэрии (ВДВ) кыаҕын, күүһүн көрдөрүөхтээхтэр.
Билигин иллэрээ күнтэн Москваҕа бааллар, генеральнай эрэпэтииссийэҕэ бэлэмнэнии кытаанаҕа. Кинилэргэ төлөпүөн мээнэ көҥүллэммэт, иллэҥ буоллаҕына, өрөбүлүгэр бэйэтэ эрийээччи,
— диэн кини кэпсээтэ.
Ону тэҥэ быйыл Кыайыы параадыгар эмиэ бу училище курсана, М.А. Алексеев аатынан Үөһээ Бүлүүтээҕи өрөспүүбүлүкэтээҕи лицей-интэринээт выпускнига Анатолий Ачикасов кыттаары бэлэмнэнэ сылдьар.

Уолаттарбытыгар ситиһиини баҕарыаҕыҥ! Аҕа дойдуну көмүскүүр Улуу сэриигэ дьоруойдуу быһыыны көрдөрбүт биир дойдулаахтарын туйахтарын хатаран, саха уолаттара, кинилэр ааттарын ааттата туруҥ! Оттон биһиги, ыам ыйын 9 күнүгэр Кыһыл болуоссакка Арассыыйа күүһүн, көмүскэллээх буолуутун көрдөрөр, хорсун буойуттарга сүгүрүйэр параад кэмигэр, итиннэ саха норуотун кылаата эмиэ баар диэн киэн тутта саныахпыт.

Ангелина Васильева, “Саха сирэ” хаһыат, edersaas.ru
Хаартыскаҕа: иккис эрээккэ хаҥастан үһүс — Марк Колесов.

+1
0
+1
0
+1
0
+1
0
+1
0
+1
0
+1
0