Ханнык баҕарар дьыаланы саҕалыырга бастаан баҕа эрэ наада.
— Мин интэриэһиргии таарыйа: «Бэйи эрэ, хайдахтаах дьон бэйэ дьыалатын аһан үлэлэтэллэр эбитий?»— диэн санааттан, уруккуттан значок, мэтээл уонна араас сувенир оҥорор баҕа санаабын олоххо киллэрэргэ соруммутум, — диэн кэпсэтиибитин саҕалыыр урбаанньыт Семен Собакин.
Биллэн турар, уран оҥоһугу оҥорон таһаарарга, мээнэ толкуйдаат, олоххо киллэрэн барбатыҥ чахчы. Мастарыскыай, үлэһит илии, матырыйаал — барыта тэрээһини эрэйэр үлэ. Толкуйдаабытын олоххо киллэрэригэр саҥа саҕалаан эрэр урбаанньыкка урбааны өйүүр тэрилтэ бизнес-инкубаторга резидент быһыытынан миэстэ, субсидия, сүбэ-ама биэрбитэ.
— «Көмө, өйөбүл оҥорбуттара», — диэн эттэххэ эрэ дөбөҥ. Дьиҥэр, үстэ төхтүрүйэн туран куонкурустаспытым. Ол кэннэ, дьэ, санаабыппын ситиспитим, — диэн бастаан атаҕар туран, хайдах олохтоох бородууксуйаны оҥорорго ылсыбытын кэпсиир урбаанньыт.
— Дьоҕус бизнес эйгэтигэр конкуренция — киһини хамсатар дьоһун күүс. Олохтоох урбаанньыттар үлэлэрин кытта кытай оҥоһуктара күөн күрэстэһэллэр. Кытайдар кутар тимирдэрин хаачыстыбата Арассыыйа тимири кутар тэрилтэлэрин кытта тэҥнэһиэ ыраах. Ол да иһин буолуо, кинилэр мэтээллэрэ уонна значоктара биһиги оҥорон таһаарбыт оҥоһуктарбытыттан биллэ атыттар, хаачыстыбалара мөлтөх. Аны кытай тимиригэр туттуллар химическэй эттиктэр доруобуйаҕа буортулаахтар. Кэрэхсэбиллээҕэ, маны барытын сакаасчыт өйдөөтө уонна олохтоох оҥорон таһаарааччыны өйөөтө, — диэн киэн тутта этэр Семен Семенович.
Кырдьык, кэлиҥҥи кэмҥэ дьиэ кэргэн, тэрилтэ, биирдиилээн дьон ситиһиитин мэтээлгэ, значокка уонна корпоративнай бэлиэлэргэ тиһэн үйэтитэр буоллулар. Онон уус уран ис хоһоонноох оҥоһугу оҥорон таһаарар Семен Собакин курдук олохтоох урбаанньыттарга «күөх уот» умайда.
Ким интэриэһиргээбит, Семен Собакиҥҥа 89142741150 нүөмэргэ эрийэн билсиэн сөп.
Елена ПОТОЦКАЯ, «Саха сирэ» хаһыат, edersaas.ru