close
Саха ыччата бэйэ оҥоруутун хайысхатын сайыннарар...
Олох-дьаһах

Саха ыччата бэйэ оҥоруутун хайысхатын сайыннарар

Бу күннэргэ «Кыайыы 50 сыла» спорт дыбарыаһыгар промышленность уонна сибээс технологиялара сайдыыларыгар туһуламмыт сыл аайы ыытыллар Регионнар икки ардыларынааҕы быыстапка буола турар.

edersaas.ru


Тэрээһиҥҥэ Арассыыйа куораттарыттан уонна Саха сириттэн 50-тан тахса тэрилтэ кыттыыны ылла. СӨ Бырабыыталыстыбата, промышленность, сибээс уонна информационнай технология, тырааныспар, айылҕа харыстабылын  министиэристибэлэрэ тэрийэр быыстапкаларын чэрчитинэн араас хайысханан сайдар ааттаах-суоллаах бөдөҥ тэрилтэлэртэн саҕалаан, былырыыҥҥыттан бэйэ дьыалатын тэринэн, олохтоох бородууксуйаны оҥорон таһаарар предпринимателлэргэ тиийэ бааллар.

Кытай үгэс буолбут медицинэҕэ көрүҥнэрин баһылаабыт Цао Бинь Саха сиригэр олохсуйбута 7 сыл буолбут. Массаас араас көрүҥүн бэркэ билэр предприниматель Дьокуускайга бэйэтэ тэрилтэлээх. Кини быыстапкаҕа бэйэтин ньыматын билиһиннэрэн, дьон интэриэһин тарта.

Быыстапка икки былаһаакканан үлэлээтэ. Ол курдук, улахан кыамталаах көлө араас көрүҥэ таһырдьа эмиэ турда.

Киһи өрөспүүбүлүкэ хоту улуустарыгар олус наадалаах көлөлөрү көрө туран: «Хаһан бу манан хоту дойду дьоно айанныыллар...» — диэн ымсыыра саныыр.

Мин Нам улууһуттан сылдьар Борис Захаров оҥорон таһаарар бородууксуйатын, сорбены — гааһы, паары оборон ылар эттиги болҕомтоҕо ыллым. Эдэр киһи 2009 с. Саха государственнай университетын хайа үлэтигэр факультетын бүтэрэн баран, балтараа сыл «Сахаэнерго» тэрилтэҕэ үлэлээбит.

Онно күнү-быһа көмпүүтэри «маныыртан» олус сылайбытым. Ханна да барбаккын-кэлбэккин, туох да саҥаны айбаккын-туппаккын. Ол иһин бэйэ дьыалатын арынарга санаммытым. Дипломмун суруйарбар «сорбент» диэн айылҕа матырыйаалын туһатын өйдөөбүтүм. Билиҥҥи кэмҥэ гааһы, паары оборон ылар эттик наһаа наадаалаах матырыйаалынан буолла.  Ньиэп тохтон саахал таҕыстаҕына, сорбент эрэ быыһыыр кыахтаах. Улахан кээмэйдээх буолан, киһи ылсар дьыалата. Ол эбэтэр, айылҕаҕа ыһылла сытар матырыйаал — күөл муоҕа буоллаҕа.  Сорбент күөлү уолларар айылҕа «бэйэтэ оҥорон таһаарар» эттигэ. Биһиги күөлү ырааһырдаары, муоҕу илиинэн ыраастыыбыт. Ону куулга хаалаан аҕалан,  тиит мас хатырыгын кытта бииргэ былаан, анал тэрилгэ бытарытабыт.

Бу матырыйаалы Москва уобалаһын Воскресенскай куоратын «Тест-эксперт» чинчийэр лабораториятыгар үөрэттэрэн баран, 2020 сылга диэри бородууксуйабытыгар аккредитация аттестатын ылбыппыт, — диэн кэпсиир Борис Захаров.

Эдэр киһи анал үөрэхтээх буолан, бу хайысханы тутуспут. Ол курдук, предприниматель үрдүк үөрэҕи бүтэрэригэр дипломун тиэмэтэ ньиэп тохтон, саахал тахсар түбэлтэтигэр айылҕаны харыстааһын туһунан эбит.

 

Борис Захаров 2017 сыл сэтинньитигэр бэйэ дьыалатын тэриммит. Онон биир  эрэ сыл иһигэр бэйэ бородууксуйатын оҥорон таһаарар киһи диэтэххэ, тахсыылаахтык үлэлиир. Номнуо сир анныттан хостонор баайы чинчийиигэ үлэлэһэр «Прогноз» диэн промышленнай тэрилтэ 1 (биир) тн сорбены атыылаһарга дуогабардаспыт. Предприниматель бэйэтэ экология , промышленность миниистирдэригэр киирэн, оҥорон таһаарар бородууксуйатын сырдаппыт. Кэлэр сыл саҥатыгар тендергэ кыттар былааннаах.

Докумуону хомуйууга, көҥүл ылыыга, бородууксуйаны анал лабораторияҕа бэрэбиэркэлэтэргэ сыл аҥаара барбыта. Сыахпытын бэйэбит тэриммиппит. Күөл муоҕун, мас хатырыгын бытарытар тэрили атыылаһыыга эмиэ бириэмэ барда. Былырыын, быйыл сайыны баттаһан, күөллэртэн айылҕа матырыйаалын хомуйбуппут. Онон кыһын үлэлииргэ саппаастаахпыт, — диэн  кэпсиир Борис.

Түгэнинэн туһанан, эдэр предприниматель анал тэрили атыылаһарга Нам улууһун дьаһалтата үбүнэн көмөлөспүтүгэр махталын тиэрдэр.

Тыа сиригэр олорор саха ыччата Борис Захаров бэйэ дьыалатын тэринэн, ааттаах-суоллаах Арассыыйа бөдөҥ тэрилтэлэрин кытта биир быыстапкаҕа кыттар чиэскэ тиксибититтэн үөрэн, санаатын  үллэстэр:

Маннык улахан тэрээһиннэргэ кыттыы бэйэ дьыалата сайдыытыгар олус туһалаах эбит. Киһи элбэҕи билэр, атыттартан үөрэнэр, билиитэ-көрүүтэ кэҥиир, сайдар.

Оттон ол да иһин маннык тэрээһиннэр ыытыллар буоллахтара — бэйэ-бэйэттэн үөрэнэн, уопут атастаһан, санаа үллэстэн сайдыы саҕахтарын торумнаары. 

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа ааптар түһэриитэ

#бүгүн: 4
1
0

Сайт матырыйаалларын ааптар көҥүлэ суох ылар бобуллар.

Мин санаам:

восемнадцать + четырнадцать =