Саха уола Аллараа Бэстээххэ пуойаһы ыытан кэллэ (ВИДЕО)

Ааптар: 
Бөлөххө киир:

Бу күннэргэ батсаапка тимир суол устун саха уола пуойас ыытан иһэр видео-устуута тарҕанна.

edersaas.ru

«Бүгүн Нерюнгриттан Алданнаан иһэбит. Грузовой пуойас ыытан иһэбит. Көмөлөһөөччүм Аллараа Бэстээхтээҕи суол техникумун выпускнига, Таатта улууһун Кыйы нэһилиэгин ыччата Софрон Варламов. Араадьыйабыт, уоппут-күөспүт, гааспыт, «вперед-назад»… 8 позициялаах «максимальнайга» турар. Кыра сыыры тахсан иһэбит. Ыйааһыммыт ыарахан буолан, «скороспыт» — 32-нэн эрэ айанныыбыт. Сахабыт сиригэр 3 300 туонна ыйааһыннаах курууһу илдьэ иһэбит…» — диэн эдэр киһи кэпсии иһэрин, киһи  истэ олоруох курдук.

Мин эдэр киһи төлөпүөнүн булан, кини кимин чугастык билиһиннэрэрдии сананным. Мэҥэ Хаҥалас Майатыттан төрүттээх Алдан куорат олохтооҕо Николай Сидоров 2014 с. Аллараа Бэстээхтээҕи транспорт техникумун бүтэрбит бастакы выпускниктартан биирдэстэрэ.

Үөрэхпин бүтэрэн баран, икки сыл «Саха сирин тимир суоллара» хампаанньаҕа тепловоз машиниһын көмөлөһөөччүтүнэн үлэлээбитим. Онтон  икки сыл үлэлээн баран, 2016 с. Тыындаҕа тепловоз машиниһын кууруһугар үөрэммитим. Машинист көмөлөһөөччүлэриттэн талан, иккилии киһини үөрэттэрэллэр. Онно хабыллан аҕыс ый үөрэнэн, тепловоһу ыытар машинист быраабын ылбытым. Былырыын бэс ыйыттан саҕалаан, тепловозтары ыытар буолбутум. Сахаттан бастакы машиниспын. Уопсайынан машинистартан саха ыччата иккиэбит эрэ. Тепловоз машиниһын ыытааччылар көмөлөһөөччүлэринэн билигин 10-тан тахса ыччат үлэлиир. Икки уол мин курдук анал кууруска үөрэнэ сылдьар. «Саха сирин тимир суоллара» хампаанньаҕа сахалар элбээн эрэбит. Кэлиҥҥи кэмҥэ «Саха ыччатын — промышленноска!» диэн хамсааһын күүскэ сайдан, тимир суол салаатыгар үлэлиир ыччат элбэхпит. Суол оҥоһуутугар, вагоннары өрөмүөннээһиҥҥэ, айан диспетчердэригэр үөрэнэллэр, үлэлитиллэр. Транспорт техникума аһыллан, анал үөрэҕи хото баһылаан эрэбит, — диэн кэпсиир Николай Сидоров.

Сэһэргэһээччим кэпсииринэн, тимир суол салаатыгар үлэлиир саха ыччатын орто сааһа — 25. Бары анал үөрэхтээхтэр. Табах, арыгы диэни билбэт дьон.

Николай Сидоров — кэргэннээх. икки оҕолоох. Кэргэнэ эмиэ тимир суол салаатыгар үөрэнэ сылдьан, оҕолонон «академҥа» олорор.

Түгэнинэн туһанан, «Саха сирин тимир суоллара» акционернай хампаанньа генеральнай дириэктэригэр Василий Шимохиҥҥа истиҥ махталбын тиэрдэбин. Олохтоох саха ыччатын наһаа өйүүр салайааччы. Миэхэ «кэскиллээх эдэр исписэлиис» диэн өйөөн,  Алдан куоракка саҥа тутуллубут дьиэҕэ икки хостоох кыбартыыраны анаабыттара. Онон 25 сааспар сөбүлүүр идэбинэн үлэлээн, олорор дьиэм табыллан, айарга-тутарга усулуобуйа барыта баар, — диэн санаатын үллэстэр Николай Сидоров.

Оттон видеотын туһунан ыйыппыппар, эдэр киһи:

Ити былырыын аҕам: «Үлэлиир сиргин көрүөхпүн баҕарабын, устан ыыт», — диэбитигэр устан ыппытым. Арааһа, «саха ыччата промышленноска сыстан эрэр» диэн кимиэхэ эрэ  киэн туттан көрдөрө ыыппытын, дьон эмиэ үөрүүлэриттэн тарҕаппыттар быһыылаах. Биллэн турар, саха ыччата тимир суолу баһылаан эрэрэ кими баҕарар үөрдэрэ чахчы буоллаҕа, — диэн  Николай кэпсэтиибитин түмүктүүр.

Ханна да сырыттаргын ситиһиилээх буол, Николай. Саха ыччата, кытаат, бу курдук эйигинэн дьонуҥ-сэргэҥ киэн тутта сырыттын! 

Елена ПОТОЦКАЯ, edersaas.ru

Хаартыскалар — Николай Сидоров архыыбыттан.

+1
0
+1
0
+1
0
+1
0
+1
0
+1
0
+1
0