Саха сирин юнкордара муус устар 14-24 күннэригэр Санкт-Петербурга үөрэнэ сылдьаллар. Оҕолор онно «ОМ» медиа-оскуолаҕа суруналыыстыка кууруһун ааһаллар. Оҕолору биллэр теле-ханааллар суруналыыстара, киинэ уонна телевидение исписэлиистэрэ дьарыктыыллар. Бу туһунан Н.Е. Мординов аатынан «Кэскил» таһаарыытыгар кэпсээтилэр.
Оскуола оҕолоро күн аайы 10:00 – 15:00 чааска диэри үөрэнэллэр, дьарык кэмигэр араас медиа-бырайыактары ырыталлар. Ону таһынан, интэриэһинэй тиэмэлэри буларга уонна киһи болҕомтотун тардар гына кэпсииргэ үөрэнэллэр. Үөрэх манан эрэ муҥурдаммат: оҕолор тус бэйэлэригэр сайт оҥостоллор, хаартыскаҕа түһэрэргэ уонна видеоҕа устарга үөрэнэллэр.
Үөрэх СӨ наукаларын аччыгый академиятын уонна «Кэскил» оҕо таһаарыытын көҕүлээһининэн ыытыллар. Үөрэх бу сайын Дьокуускайга ыытыллар аан дойду интеллектуальнай оонньууларыгар бэлэмнэнии чэрчитинэн ыытыллар.
«Үөрэх кууруһун кэннэ оҕолор суруналыыс идэтин толору билиэхтэрэ диэн күүтэбит. Кинилэр көрөөччүгэ, ааҕааччыга интэриэһинэй уонна умсугутуулаах матырыйаалы эрэ көрдөрөр буолбакка, бэйэлэрин санааларын туруорсар буолуохтаахтар», – диир медиа-оскуола дириэктэрэ Максим Мирошниченко.
Эдэр корреспонденнары «ОМ» медиа оскуола дириэктэрэ Максим Мирошниченко, «Дождь» телеканал корреспондента Евгения Зобнина, «Санкт-Петербург» телеканал продюсера Елена Никуличева, «Собака.ру» сурунаал эрэдээксийэлиир дириэктэрэ Виктория Пятыгина, BlueberryVisuals студия дизайнера Юрий Черников, «Медиазона» таһаарыы хаартыскаҕа түһэрэр корреспондена Давид Френкель уонна да атыттар уһуйаллар.
Анал кууруһу таһынан оҕолор куорат үрдүк үөрэх кыһаларын кытта билсэллэр. Киинэ уонна телевидение институтугар номнуо сылдьан, телестудия хайдах үлэлиирин илэ харахтарынан көрдүлэ-иһиттилэр. Инникитин Ленфильм студияҕа, «Яндекс» эрэдээксийэтигэр сылдьар былааннаахтар.
Александра Коновалова хаартыскаҕа түһэриитэ.