“Сахабэчээт” Курбуһахха ыалдьыттаата

Ааптар: 
Бөлөххө киир:

Уус Алдан улууһун Курбуһах нэһилиэгэр «Сахабэчээт» АТ күнэ буолла. Бу туһунан биһиэхэ нэһилиэк бибилэтиэкэрэ Марфа Пестрякова кэпсээтэ.

edersaas.ru


Ол курдук, оскуолаҕа саха литературатын биһигэ буолбут  “Чолбон” сурунаалтан, социальнай эйгэ боппуруостарын сырдатар “Забота-Арчы” хаһыаттан,  дьиэ кэргэн күүтэр, сэҥээрэр “Далбар Хотун” сурунаалыттан  суруйааччылар, суруналыыстар уонна Дьокуускайдааҕы тыа хаһаайыстыбатын академиятын преподавателлэрэ,  устудьуоннара ыалдьыттаабыттар. Тыа сиригэр бэрт сэргэх, туһалаах  тэрээһин буолбутуттан нэһилиэнньэ улаханнык сэргэхсийбит.

Кинигэлэр, сурунааллар быыстапкаларын оҥорон туруорбуппун дьон-сэргэ улаханнык кэрэхсээтэ, сэҥээрдэ. Уларсан ааҕыах баҕалаах үксээтэ. 1968 сыллааҕы “Хотугу сулуһу” сөҕө-махтайа көрдүлэр. Ыалдьыттар кэмиттэн-кэмигэр маннык тэрийэр туһалааҕын, ордук оҕолорго билиилэрин-көрүүлэрин хаҥаталларыгар көмөлөөҕүн эттилэр. Кинилэр салгыы саалаҕа мустан олорооччуларга үлэлэрин-хамнастарын сырдаттылар, ыйытыыларга хоруйдаатылар. Бу күн тэриллибит чэпчэтиилээх сурутуу түмүгүнэн сүүйүүлээх оонньуу ыытыллыбыта улахан сэргэхсийиини таһаарда. Сүрүн бирииһи — үрүҥ көмүс киэргэли  нуучча тылын учуутала Валентина Афанасьевна Тордуянова тутан үөрүү-көтүү буолла.

Нэһилиэкпитигэр баар кырдьаҕастар уонна инбэлииттэр интэринээт дьиэлэригэр бильярдка күрэхтэһиигэ үс хамаанда күөн көрүстэ. Ыраахтан кэлбит ыалдьыттары кытары олохтоохтор икки хамаанда туруоран киирсибиттэрэ күрэхтэһиини сытыырхатан биэрдэ.

Нэһилиэк спортивнай саалатыгар остуол тенниһигэр энтузиаст-тириэньэр Аркадий Афанасьев маастар-кылаас тэрийбитэ табылынна. Баҕалаахтар, ордук эдэр ыччат уонна оскуола үөрэнээччилэрэ теннистээн бэйэлэрин холоннулар. Бу оонньуу араас албаһыгар үөрэннилэр, сүбэ-ама ыллылар.

Суруйааччылары Данил Макеевы, Галина Нельбисованы кытта көрсүһүүгэ бибилэтиэкэҕэ элбэх киһи муһунна. Олохтоохтор киэн туттар дойдулаахтара, сүгүрүйэр бэйиэттэрэ, ССРС суруйааччыларын Сойууһун чилиэнэ Г.Г.Вешников – Баал Хабырыыс кэлэр саас төрөөбүтэ 100 сыла туоларынан элбэх ыйытыыларын онно туһаайдылар. Айымньылара  “Чолбон” сурунаалга тахсыахтара дуо диэн ыйыттылар, кинигэлэрэ хос бэчээттэнэллэригэр баҕаралларын биллэрдилэр.

Маны сэргэ, Марфа Анатольевна ДьТХА преподавателлэрэ, устудьуоннар ыччакка туһалаах иһитиннэриилэри биэрбиттэрин бэлиэтиир. Онон курбуһахтар бэртээхэй тэрээһинтэн улаханнык сэргэхсийбиттэр. Киэһэ култуура дьиэтигэр тыа хаһаайыстыбатын академиятын  “Нуурал” ансаамбылын ырыаһыттара уонна “Сахабэчээт” үлэһиттэрэ кыттыылаах кэнсиэр буолбут. Тэрээһиҥҥэ сылдьыбыттар аныгы үйэ ирдэбилинэн хаһыаттарга, сурунаалларга сурутуу маннык хайысханан барарын кэрэхсииллэрин, тыа сиригэр олорор дьон сэргэхсийэллэрин, суруналыыстары кытта көрсөн сэһэргэһэн билбэтэхтэрин билэллэриттэн, сонуну истэллэриттэн үөрэллэрин эппиттэр, ыалдьыттарга махтаммыттар.

Сардаана БАСНАЕВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0