От ыйын 11 күнүгэр Дьокуускайга «Бэчээт дьиэтигэр» «Сахабэчээт» автономнай тэрилтэ уонна Дьокуускайдааҕы тыа хаһаайыстыбатын академията бииргэ үлэлиир туһунан дуогабар түһэристилэр.
«Сахабэчээт» автономнай тэрилтэ сүрүн дириэктэрэ Филипп Пестряков кэлэктииби үөрүүлээх түгэннэринэн итиитик-истиҥник эҕэрдэлээтэ уонна билиҥҥи үлэлэрин, ситиһиилэрин туһунан кылгастык сырдатта. Кини «Чолбон» уонна «Полярная звезда», «Далбар Хотун» сурунааллар уонна «Забота-Арчы», «Илкэн» хаһыаттар таһаарыылаах үлэлэрин бэлиэтээн ааста. Билиҥҥи кэмҥэ санааны түмэн бииргэ үлэлээһин наадатын ыйда.
Салгыы ДьТХА ректора Иван Слепцов тыл эттэ. Кини «Сахабэчээт» автономнай тэрилтэ үлэһиттэрин кытта быйыл кулун тутар 29 күнүгэр көрсүһүү түмүгэр бииргэ алтыһан үлэлиир баҕа үөскээбитэ үчүгэй түмүккэ кэлэн, салгыы сайдарыгар эрэнэрин биллэрдэ. Ол кэнниттэн дуогабар түһэрсэн, илии баттаһыы үөрүүлээх түгэнэ ытыс тыаһа доҕуһуоллаах буолла.
Иван ОСИПОВ, edersaas.ru сайтка анаан.
Ааптар хаартыскаҕа түһэриилэрэ.