Сахалартан бастакы консул Александр Мигалкин аатын үйэтитээри

Ааптар: 
Бөлөххө киир:

СӨ тас сибээскэ миниистиринэн, сахалартан бастакынан тас дойдуга Монголияҕа РФ генеральнай консулунан үлэлээбит Александр Васильевич Мигалкин баара буоллар быйыл 60 сааһын туолуох этэ.

edersaas.ru


Саха норуота Александр Мигалкины сүтэрбитэ алта сыл буолла… Бу кэм устата олох уларыйда, Саха сирэ үөрэхтээһин, култуура, спорт, өй-санаа бары хайысхаларыгар сайдыы саҥа таһымыгар таҕыста. Александр Мигалкин билигин биһиги кэккэбитигэр төһө даҕаны суоҕун иһин, Саха сирин бүгүҥҥү ситиһиилэригэр киллэрсибит кылаата үгүс. «Кини тас дойдулары кытта сыһыаҥҥа үгүс кэскиллээх үлэни ыыппыта, саҥа сүүрээннэри киллэрбитэ. Онуоха сөптөөх каадырдары иитэн таһаарбыта. Ол барыта түмүллэн, силистэнэн, ситэн-хотон, саҥаттан-саҥа таһымҥа тирэҕирэн тахсан иһэбит. Оннук инникини өтө көрөн үлэлиир, киэҥ өйдөөх-санаалаах киһи этэ. Кини кылгас уонна чаҕылхай олоҕу олорбута. Александр Мигалкины букатыннаахтык сүтэрии ыар аһыытын кэм-кэрдии хаамыыта уҕарыппата оннук үтүө киһи этэ, биһиги кэллиэгэбит, доҕорбут, сүбэһиппит», — диэн бииргэ үлэлээбит кэллиэгэлэрэ, чугас доҕотторо, табаарыстара ахталлар.

Дипломат, сахалартан бастакы генеральнай консул, хас да омук тылын баһылаабыт, кылгас эрээри чаҕылхай олоҕу олорон ааспыт үтүө киһи 1975 сыллаахха Мүрү 1 №-дээх орто оскуолатын бүтэрбитэ. Быйыл бу оскуола төрүттэммитэ 145 сыла. Александр Васильевич Мигалкин курдук чаҕылхай выпускниктарын бүгүҥҥү 661 үөрэнээччилээх оскуола кэлэктиибэ умнубат. Быйыл кини төрөөбүтэ 60 сылыгар анаан, улуустааҕы бастакы «Эдэр дипломат» куонкуруһу тэрийэн ыытта.

Александр Васильевич диэн кимий, кини үлэһит, дьиэ кэргэн аҕатын, убай, быраат, уопсайынан киһи, доҕор быһыытынан хайдах этэй? Бу туһунан бүгүҥҥү көлүөнэ ыччакка үтүө өйдөбүлү Александр Васильевич уола, СӨ Үөрэҕин уонна наукатын миниистирин солбуйааччы Василий Мигалкин ийэтиниин Надежда Иннокентьевналыын, Арассыйатааҕы Тас дойдуларга министиэристибэ Дьокуускай куоракка бэрэстэбиитэлэ Николай Дьяконов, СӨ Тас сибээскэ департаменын салайааччытын бастакы солбуйааччы Диана Степанова, департамент Американы уонна Европаны кытта үлэлиир салаа салайааччыта Айталина Никифорова, Александр Васильевич бииргэ улааппыт, үөрэммит доҕоро, медицина наукатын доктора, Дьокуускайдааҕы оҕо балыыһатын кылаабынай бырааһа Маргарита Самсонова, бииргэ төрөөбүттэрэ Афанасий, Иван, Зоя, Мария Мигалкиннар, экэниэмикэ наукатын кандидата Владимир Черноградскай иҥэрдилэр. Онтон СӨ Владивостокка, Благовещенскайга, Кытайга Пекин куоракка бастайааннай бэрэстэбиитэли солбуйааччылар, Александр Васильевич иитэн-үөрэтэн таһаарбыт кэллиэгэлэрэ Ким Борисов, Геннадий Жирков, Степан Андреев быһа сибээскэ тахсан, куонкурус кыттыылаахтарыгар эҕэрдэлэрин тиэртилэр.

Уус Алдан улууһун баһылыга Алексей Федотов быйыл АВ.Мигалкин төрөөбүтэ 60 сылын бэлиэтиир тэрээһиннэр былаан быһыытынан баралларын иһитиннэрдэ.

Дипломат, сахалартан бастакы генеральнай консул 60 сааһыгар анаммыт «Эдэр дипломат» куонкуруска Мүрү 1 №-дээх, Мүрүтээҕи уолаттар гимназияларыттан, Дүпсүн, Лөгөй оскуолаларыттан барыта 16 оҕо кытынна. Кинилэр быһа сибээскэ түөрт түһүмэххэ кыахтарын холоннулар: бэйэлэрин бырайыактарын көмүскээтилэр; дьылабыай тиэкиһи английскайтан нууччалыы тылбаастаатылар; аан дойду, Арассыыйа бэлиитикэтин таарыйар тиэмэлэргэ тута бэйэлэрин санааларын этэн, тыл-өс өттүгэр сатабылларын көрдөрдүлэр; төрөөбүт дойду историятын төһө билэллэрин тургуттулар.

Бастакы «Эдэр дипломат» куонкурус муҥутуур кыайыылаахтарынан Дүпсүн орто оскуолатын 10 кылааһын үөрэнээччитэ Дима Румянцев, Мүрү 1 №-дээх оскуолатын 9 кылааһын үөрэнээччитэ Дьулус Павлов уонна Мүрүтээҕи уолаттар гимназияларын 8 кылааһын үөрэнээччитэ Айсен Бочкарев буоллулар. Маны таһынан Дьулус Павлов Арассыыйа Тас дойдуларга министиэристибэтин Дьокуускай куоракка бэрэстэбиитэлэ Николай Дьяконов тус бэйэтэ анаабыт бирииһин тутта.

Куонкурус тэрээһинигэр «Кэнчээри» оҕо образцовай ансаамбыла Арассыыйа, Саха сирин, Уус Алдан гимнин, Александр Васильевич саамай таптаан ыллыыр «Доҕоруом, дабай күөх сыырдаргын» ырыатын «Мүрү эрэллэрэ» ансаамбыл толордулар. «Александр Васильевич сырдык кэриэһигэр анаммыт «Эдэр дипломат» куонкуруһу тус бэйэм хонтуруолбар ылыам. Салгыы эһиги, дипломат, сахалартан бастакы генеральнай консул төрөөбүт дойдутун, үөрэммит оскуолатын ыччаттара, өрөспүүбүлүкэ таһымыгар ыытыллар куонкуруска кыттаргыт наада», — диэн Николай Дьяконов бу куонкурус кэскиллээҕин туһунан бэлиэтээн эттэ.

Сардаана МАТВЕЕВА, «Саха сирэ» хаһыат, edersaas.ru сайтка анаан

+1
0
+1
0
+1
0
+1
0
+1
0
+1
0
+1
0