Бэҕэһээ Бэчээт дьиэтигэр, “Саха сирэ” хаһыат эрэдээксийэтигэр, сахалыы тыллаах судаарыстыбаннай хаһыат мусуойа аһылынна.
Бу дьоҕус хоско дириҥ историческай суолталаах, бэрт үгүс, интэриэһинэй экспонат түмүллүбүт. Ол курдук, саха тылынан аан бастакы «Манчаары» хаһыат бастакы нүөмэрэ 1921 сыл ахсынньы 28 күнүгэр күн сирин көрбүтүн, салгыы 1923 сыллаахха «Кыым» саҕыллан тахсыытын, 70-тан тахса сыл устата норуотун кытта бииргэ түһүүлээх-тахсыылаах кэмнэри ааспытын, онтон үйэлэр солбуйсар быыһык кэмнэригэр,1990 сыл балаҕан ыйыгар саҥа кэм хаһыатын – «Саха сирэ» хаһыаты тэрийэр туһунан уураах ылыллыытын туоһулуур докумуоннар көрдөрүүгэ туруоруллубуттар.
Биллэрин курдук, 1993 сыл алтынньытыгар «Кыым» уонна «Саха сирэ» хаһыаттар холбоспуттара, биир эрэдээксийэ тэриллибитэ. Онон, “Манчаары”— “Кыым” уонна “Саха сирэ” – ситим быстыбат!
Мусуойга, Аҕа дойду Улуу сэриитигэр хорсуннук сэриилэспит “Кыым” суруналыыстарын, сэрии толоонугар охтубут буойун-суруналыыстар көмүс буукубаларынан суруллубут ааттара, хаартыскалара дьоһун миэстэни ылаллар.
Хаһыат наҕараадалара, Кыһыл знамята, аксакал-суруналыыстар рукописьтара, сэдэх хаартыскалар саамай көстүүлээх сиргэ ууруллубуттар. Оттон “Кыым” эрэдээксийэтин үрдүк наҕараадата — “Үлэ Кыһыл Знамята” уордьан эрэллээх сиргэ ууруллубутун бүгүн биһиги эмиэ туоһулуох кэриҥнээхпит.
Мусуой аһыллыытынан эрэдээксийэ кэлэктиибин “Сахамедиа” РИИХ” АУо Генеральнай дириэктэрэ Кирилл Алексеев, “Саха сирэ” хаһыат кылаабынай эрэдээктэрэ, мусуой тэриллиитин көҕүлээччи Чокуур Гаврильев уонна “Кыым”-“Саха сирэ”, бэчээт бэтэрээнэ, П.Ойуунускай аатынан судаарыстыбаннай бириэмийэ лауреата Дмитрий Кустуров эҕэрдэлээтилэр.
“Кыым”-“Саха сирэ”, бэчээт бэтэрээнэ, СӨ култууратын үтүөлээх үлэһитэ, бу мусуой тэриллиитигэр үгүс сыратын-кыһамньытын биэрбит, мусуой үлэтин иилээччи-саҕалааччы Иван Ксенофонтов мустубут дьоҥҥо “Кыым” чаҕылхай историятыттан үгүс интэриэһинэй чахчылары билиһиннэрдэ.
Татьяна МАРКОВА, edersaas.ru