Сахалыы национальнай многоборьеҕа ким күүстээҕэ үс күннээх хатыһыылаах киирсии түмүгэр дьэ билиннэ. Ону бүгүн Нам нэһилиэгин Хомустааҕар саҥа тутуллубут спорт былаһааккатын дьоҕус стадионугар 1 тыһ. миэтэрэҕэ сүүрүү быһаарда.
Бу тиһэх бэһис көрүҥҥэ эр дьоҥҥо Николай Матаннанов (Дьокуускай) алтыс көрдөрүүлэннэ эрээри, ити иннинээҕи көрүҥнэргэ барытыгар эриэ-дэхситик киирсэн, бастаан таҕыста. Кини сүрүн утарсааччыта Петр Старостин (Чурапчы) күлүмэх сүүрүүнү көрдөрөн, барыларын кыайталаата буолан баран, иккис миэстэтигэр хаалла. Сүүрүүгэ диэри үһүс миэстэҕэ испит Антон Тойтонов (Нам) биэтэккэ 15-с киһинэн кэлэн, кэдэйэн биэрдэ: төрдүс миэстэҕэ сылдьыбыт Любомир Николаев (Үөһээ Бүлүү-I) онус көрдөрүүлэннэ уонна Тойтоновы туора хаһыйан, үһүс үктэлгэ олоро түстэ.
Дьахталларга Диана Тартакынова (Үөһээ Бүлүү-I) 1 тыһ. миэтэрэҕэ эрэллээхтик бастаата итиэннэ биэс көрүҥ түмүгүнэн муҥутуур кыайыылаах аатын ылла. Уолаттарга, күүтүллүбүтүн курдук, икки көрүҥҥэ (тутум эргииргэ уонна тааһы көтөҕүүгэ) рекорд олохтообут Айсен Ботуев бастаата. Кыргыттарга бары көрүҥҥэ кыайбыт Диана Адасько (Дьокуускай) холкутук бастакы миэстэни ылла. Оттон олохтоохтор эрэллэрэ Наталья Харабынова (Үөһээ Бүлүү-I) уопсай түмүккэ иккис миэстэлэннэ.
Инньэ гынан, түөрт бөлөххө төрдүөннэригэр күүстээх спортсменнары туруорбутҮөһээ Бүлүү улууһун хамаандата кыайыы-хотуу көтөллөннө.
Василий НИКИФОРОВ, «Саха сирэ» хаһыат, edersaas.ru
Ааптар хаартыскаҕа түһэриилэрэ.