Саха киһитэ барахсан күөххэ үктэммитин бэлиэтигэр Ыһыах ыһар. Эдэриттэн эмэнигэр тиийэ ыһыахха сахалыы таҥнар, араас киэргэли иилинэр. Ыһыаҕы көрсө М.К.Аммосов аатынан Хотугулуу-Илиҥҥи федеральнай университет сахалыы таҥаска, киэргэлгэ аналлаах лиэксийэлэри ыытар.
Сахалыы таҥас бэйэтэ туспа уратылаах, суолталаах. Ол туһунан бары билэбит дуо? Саарбах. Ол курдук, социальнай ситимнэринэн ыһыах таҥаһын сыыһа таҥнабыт диэн араас иһитиннэриилэр тарҕаналлар. Эбэтэр киэргэл, киһини киэргэтэр эрэ буолбакка, кини тутта-хапта сылдьыытыгар уонна тулалыыр дьоҥҥо дьайар күүстээх эбит. Ону таһынан урукку кэми арыйар күүстээх. Киэргэли кэтэ сылдьыбыт киһи итэҕэлин, дьахтарын дуу, эр киһитин дуу, кини сааһын, социальнай таһымын барытын кэпсиир кыахтаах эбит.
Ыһыах чугаһаата, сахалыы таҥас, киэргэл хоппоттон хостонно. Ол эрээри, саха киһитэ илиитинэн тутан-хабан көрөрүн, сүүстэ истибитинээҕэр биирдэ көрөрүн ордорор диэн мээнэҕэ эппэттэр. Ол иһин, ХИФУ преподавателлэрэ, саха дьонугар анаан биир эрэ күн анаан-минээн лиэксийэ ааҕыахтара. Ыһыахха кэтиллэр мааны таҥас туһунан бэс ыйын 15 күнүгэр, киэһэ 18 ч 00 мүн. ХИФУ РФ Хотугулуу-Илиҥҥи норуоттарын тылларын уонна култууратын институтун доцена Светлана Петрова кэпсиэҕэ. “Уран иис” түмсүү иистэнньэҥнэрэ, маастардара тикпит таҥастарын кэтэн, хааман көрдөрүөхтэрэ.
Салгыы бэс ыйын 15 күнүгэр киэһэ 19 ч 00 мүн ХИФУ историяҕа бакылтыатын доцена Капитолина Яковлева былыргы сахалар киэргэллэрин туһунан лиэксийэҕэ ити туһунан сиһилии кэпсиэҕэ.
Эһигини Дьокуускай куорат пааркатыгар, “Ойуур бибилэтиэкэтигэр” ыҥыраллар. Билбэтэххин билиэҥ, истибэтэххин истиэҥ.
Людмила ПОПОВА, “Саха сирэ” хаһыат, edersaas.ru
Хаартыска: интэриниэттэн.