Сахамин Афанасьев: «Өрүскэ кирдээх уу тоҕуллуутуттан балык өллөҕүнэ, 3-10 мөлүйүөҥҥэ тиийэ төлөтөбүт»
Сахабыт сиригэр үлэлиир бырамыысыланнас хампаанньалара уора-көстө кирдээх ууларын ыраастаабакка эрэ өрүскэ тоҕор идэлээхтэр. Оннук түгэнтэн биирэ Нерюнгри оройуонугар арыллан, Дежневка өрүс киртийбитигэр олохтоохтор айдааны тардан, буруйдаах баара-суоҕа 140 000 солк. ыстарааптаммыт. Кинилэр эргитэр үптэригэр ол букатын кыра харчы.
edersaas.ru
Бу туһунан миниистир Сахамин Афанасьев: «Өскөтүн бырамыысыланнас хампаанньалара кирдээх ууларын өрүскэ тохпуттарыттан балык өлөн хоромньу таҕыстаҕына, 3-10 мөл солк. тиийэ төлөтөбүт. Аны бырамыысыланнас хампаанньаларыгар айылҕаны туһаныы төлөбүрдээх. Кинилэр хас кыбаартал аайы ууну, салгыны, айылҕаны киртитэллэрин, тобохторун тоҕоллорун иһин үтүмэн үбү төлүүллэр. Сылга ол харчылара 700-800 мөлүйүөҥҥэ тиийэр. Ол харчы 5% федеральнай, 40% эрэгийиэннээҕи уонна 55% олохтоох бүддьүөккэ киирэр. Ол харчытынан улуустар ууну ыраастыыр тэрил атыылаһыахтаахтар, айылҕаны харыстыыр тэрээһиннэри ыытыахтаахтар. Ити киирбит 55% үбү атын улуус бүддьүөтүгэр биэрэр табыллыбат. Хампаанньа үлэлиир эрэ сирин муниципалитетыгар харчы төлүүр, 32 улууһу барытын хааччыйбат.
Аны билиҥҥи сокуон быһыытынан ООПТ (ураты харыстанар айылҕалаах сир) холобур, Сиинэҕэ, Аммаҕа, Өлүөнэ остуолбаларыгар геологтар ойууру кэрдибэккэ, сири дэлби тэптэрбэккэ эрэ сир баайын чинчийэр үлэни ыыталлара көҥүллэнэр», — диэн эттэ.
Түмүккэ
Ол аата бырамыысыланнас оройуоннарыгар улахан хампаанньалар айылҕаны киртитэллэрин иһин мөлүйүөнүнэн харчыны төлүүллэр. Ол харчы тус сыалга туттулларын дуу, эбэтэр куоталаһа-куоталаһа сыаналаах саҥаттан саҥа массыына, материальнай баай-дуол буолан иҥэн иһэрин тустаахтар бэйэлэрэ билэн эрдэхтэрэ.
Марианна ТЫРТЫКОВА, «Саха сирэ» хаһыат, edersaas.ru