Билиҥҥи кэмҥэ экология сытыы боппуруостара: газохимическай собуот тутуута, бырамыысыланнас хампаанньалара иһэр уубутун киртитэллэрэ, аракыата тобохторо түһэллэрэ барыбытын долгутар. Аны быйыл хас да улуус халаан уутуттан эмсэҕэлээтэ.
edersaas.ru
Ол төрдүн-төбөтүн дьүүллэһэ, «Аһаҕас бырабыыталыстыба» диэн анал бырайыак чэрчитинэн СӨ Айылҕа харыстабылын миниистирэ Сахамин Афанасьев кэлэн ыалдьыттаата.
«Өрөспүүбүлүкэ киин улуустарыгар быйыл хаар чараас уонна халлаан тымныы буолан, муус дьапталҕата халыҥаан биэрбитэ. Өлүөнэ, Амма өрүстэргэ муус нуорматтан 15-20 см. халыҥ этэ. Муус устар бүтүүтэ циклон кэлэн, сылыйан, эбэлэрбит эмиэ эрдэ эһиннилэр. Уус Маайаҕа муус кэмигэр кэбирэтиллибэккэ, улахан харыы таҕыста.
Гидрометеорология сулууспата өссө кулун тутартан халаан буоларын сэрэппитэ даҕаны, бачча элбэх уу кэлиэ диэн ким даҕаны сэрэйбэтэ5э. Сааспыт хатаан, мууһу кэбирэтэр гына сылыппакка өр туран баран халлааммыт сылыйан, элбэх уу тахсан иэдээни аҕалла. Хотугулуу-илин улуустарга 2-3 төгүл элбэх хаар түспүтэ. Алаһыай өрүс уутун таһыма үрдээн турар кэмигэр муус турбута. Ону таһынан, улахан халаан уута айылҕаҕа 5-10 сыл буола-буола хатыланар үгэстээх», — диэн миниистир быйылгы халаан төрүөтүн быһаарда.
Төһө даҕаны аныгы олох сайдыбытын иһин, киһи-аймах айылҕа күүһүн утары турара, улахан ууну биирдэ саба баттыыра кэккэ күчүмэҕэйдэрдээх.
Марианна ТЫРТЫКОВА, «Саха сирэ» хаһыат, edersaas.ru