Сайдыылаах маарыкчааннар

Ааптар: 
Бөлөххө киир:

Чурапчы улууһугар Маарыкчааннааҕы потребительскай уопсастыба кэнники сылларга урукку тэтимин ыһыктыбакка, материальнай-техническай базатын саҥардыыга, оҥорон таһаарыыны үрдэтиигэ, ороскуоту кыччатыыга үлэлээн кэллэ. Бүгүн потребуопсастыба улуус 15 нэһилиэгэр 27 маҕаһыыны, 2 уопсастыбаннай аһылык эбийиэгин,  эти астыыр, кондитерскай,  үүт  сыахтарын, 8 бэкээринэни үлэлэтэр. Тэрилтэ икки сүүсчэкэ үлэһиттээх. Үлэтин кээмэйинэн, үлэһитин ахсаанынан улуус биир улахан хаһаайыстыбаннай тэрилтэтэ буолар. 2018 сылтан саҥа талыллыбыт сэбиэт (бэр. Смирников Г.В.), бырабылыанньа (бэр. Монастырева О.П.) уонна исписэлиистэр биир өйүнэн-санаанан “Холбос” потребительскай уопсастыбалар сойуустара тэриллибитэ 100 сылын туолар үбүлүөйүн көрсө көхтөөхтүк үлэлииллэр.


Киин ититэр ситимҥэ

Сыл саҥатыттан дойду үрдүнэн бэйэ оҥорон таһаарар аһылык бородууксуйатын элбэтии, хаачыстыбаны тупсарыы соруктарыгар сөп түбэһиннэрэн,  былааннаах үлэ ыытылла турар. Ол курдук, Кытаанах, Мындаҕаайы бэкээринэлэригэр килиэп астыыр электрическай оһохтору, кондитерскай сыахха аныгы 2 конвекционнай оһоҕу Предринимательство фондатыттан  үп ылан  туруордубут. Техническэй ирдэбил быһыытынан  “Симиир”  остолобуойга, киин бэкээринэҕэ вентиляция оҥоһулунна. Чурапчы улууһугар Нэһилиэнньэ дьарыктаах буолуутун киинэ “Тыа сиригэр тэриллэр быстах уопсастыбаннай үлэлэри үбүлээһин” бырагырааматынан 5 эбийиэги өрөмүөннээтибит. Онно  үлэтэ суох аҕыс киһи хабыллан, быстах үлэнэн хааччылынна. Быйыл халаан уутугар ылларбыт Мырылаҕа элбэх үлэ барда. Ол курдук, маҕаһыын хара муостата уларытылынна, ититэр тиһигэ ыраастанна, 130 м уһуннаах теплотрасса тардылынна. Чох сыаната, тиэйии-таһыы ороскуота улаата турарынан, хочуолунайдар туруктара эргэрэн иһэринэн быйылгыттан нэһилиэктэргэ баар эргиэн объектарын киинтэн ититиллэр тиһиккэ холбооһун уонна гаас оттукка көһөрүү соруга турбута. Бу оттук сезонугар ОДьКХ киин ититэр тиһигэр Мырыла, Кытаанах, Хадаар маҕаһыыннара, бэкээринэлэр холбоннулар. Газ ситимигэр холбонорго бэлэмнэнии үлэтэ Хайахсыт маҕаһыыныгар ыытылынна.

Ростелекому кытта

Олох билиҥҥи ирдэбилинэн 11 нэһилиэккэ оптоволокно сибээһин киллэриигэ Ростелекому кытары сөбүлэҥ быһыытынан үбүлэнэн, потребуопсастыба маҕаһыыннарыгар   оптоволокно ситимэ тардыллан бүтэн эрэр. Он-лайн касса, Меркурий бырагыраама киирбитинэн түргэн, хаачыстыбалаах электроннай сибээс баар буолуута үлэбитигэр улахан оруоллаах буолла.

Дьоҕус урбаан фондата көмөлөһөр

Бу сылга потребуопсастыба өрөспүүбүлүкэ дьоҕус предпринимательствоҕа киинин кытта ыкса сибээстээхтик үлэтин саҕалаата. Манна улуус дьаһалтатын кытары бииргэ үлэлээн, федеральнай бүддьүөттэн үбүлэнэр бырайыактарга киирэр өҥөлөрүнэн ити иһинэн 4 нэһилиэги килиэбинэн хааччыйар Дириҥ бэкээринэтин уонна технологическай оборудованиетын саҥардыы бизнес-былаанын, саҥа эргиэн дьиэтигэр рекламалыыр-сырдатар полиграфическай матырыйааллары оҥорууга, бэйэ оҥорон таһаарар бородууксуйатыгар «Сделано в Якутии» диэн көҥүл сертификация систематыгар сөп түбэһэр 5 көрүҥ (килиэп, буулачыка, кондитерскай оҥоһуктарга) бородууксуйаҕа сертификат ылыыга, тэрилтэ туһунан кэпсиир рекламалыыр-иһитиннэрэр видеоролик таһаарыытыгар, сокуоннар уларыйыыларыгар юридическай сүбэлэри туһанныбыт. Инникитин да киини кытта үлэлэһэр былааннаахпыт.

Саҥа маҕаһыын аһыллыаҕа

Улуус киинигэр баар 1965 сыллаахха тутуллубут киин бородуукта маҕаһыына эргэрэн, 2017 сылга 2 этээстээх саҥа маҕаһыын тутуута былааннанан, ыам ыйыгар сыбаайата түһэриллибитэ. Тутууну бырабылыанньа бэрэссэдээтэлинэн үлэлээбит Смирников Григорий Викторович уонна техническай боппуруостарга кылаабынай исписэлиис Оногосов Федот Гаврильевич иилээн-саҕалаан ыыттылар. Аҕыйах хонугунан бу маҕаһыын —  «Маарыкчаан» эргиэн дьиэтэ аһыллаары турар. Манна бородуукта, бырамыысыланнай табаардар маҕаһыыннара, кафе үлэлиэхтээх. Аныгылыы көстүүлээх саҥа эргиэн дьиэтэ үлэҕэ киириитэ «Холбос» тэриллибитэ 100 сылын туолар үбүлүөйүнэн паайдаахтарга, улуус олохтоохторугар потребкооперация бэлэҕэ буолар. “Холбос” тэриллибитэ 100 сылын туолар үбүлүөйүнэн өрөспүүбүлүкэ бары кэпэрээтэрдэрин  итиитик-истиҥник эҕэрдэлиибит, чэгиэн доруобуйаны, ситиһиилэри, дьолу-соргуну баҕарабыт.

Ольга МОНАСТЫРЕВА,

Маарыкчааннааҕы потребуопсастыба бырабылыанньатын бэрэссэдээтэлэ, Чурапчы.

«Саха сирэ» хаһыат, edersaas.ru саайтыгар анаан

+1
0
+1
0
+1
0
+1
0
+1
0
+1
0
+1
0