Уус Алдан улууһугар «Сайра» кэнсиэрбэттэн сүһүрүү оруннааҕа бигэргэннэ.
edersaas.ru
Улууска 10 улахан киһи, 3 оҕо балык кэнсиэрбэтиттэн сүһүрбүттэрэ биллибитэ.
Оҕолору суһаллык улуустааҕы киин балыыһаҕа, оттон улахан дьону Суоттутааҕы балыыһаҕа аҕалбыттара. Манна куойкалары эбии бэлэмнээбиттэрэ. Сүһүрбүт дьон бары кэнсиэрбэлээх балыгы сиэбиттэрин бигэргэппиттэрэ.
Бэрэбиэркэ түмүгүнэн, сүһүрүү төрүөтүнэн
«16.05.2018 г. (931 1Р) «Сайра натуральная с добавлением масла «балтийская» масса 240 гр., произведено в ООО «Производственная компания пищевик» Россия 196084 г. Санкт-Петербург, Лиговский проспект, д.289, лит. А., срок годности 24 месяца»
диэн суруктаах балык кэнсиэрбэтин сиэһиннэрэ буолбут. Кинилэргэ барыларыгар «астан токсикоинфекция» диэн диагноз туруорулунна. Эмсэҕэлээбит дьоҥҥо медицинскэй көмө оҥоһуллар, ыарыһахтар туруктара куһаҕана суох.
СӨ Роспотребнадзор управлениета маннык кэнсиэрбэлэри көрдөөн, атыыттан устарга дьаһаллары ыытар. Управление 2018 с. ыам ыйын 16 күнүгэр оҥоһуллубутун туоһулуур суруктаах «Сайра» кэнсиэрбэни атыыласпыт сиргитигэр төттөрү илдьэн биэрэргитигэр уонна СӨ Роспотребнадзор управленнетыгар иһитиннэрэргитигэр сүбэлиир. 8-800-550-21-24 төлөпүөҥҥэ эрийиэххитин эбэтэр akutia@14.rospotrebnadzor.ru электроннай аадырыска суруйуоххутун сөп.
Роспотребнадзор управлениета балаһыанньаны хонтуруоллуур.
Надежда ЕГОРОВА, «Саха сирэ» хаһыат, edersaas.ru