Бэҕэһээ Лермонтов уулусса 90/4 №-игэр турар элбэх кыбартыыралаах дьиэ олбуоругар дьоһун үөрүү тосхойдо.
Дьокуускай куорат дьаһалтатын баһылыгын сүбэһитэ, көҥүл тустууга Рио-де-Жанейротааҕы Олимпийскай оонньуулар призердара, Россия алта төгүллээх чөмпүйүөнэ, Россия спордун үтүөлээх маастара Виктора Лебедев өйөбүлүнэн оҕо оонньуур былаһаакката тутуллан үлэҕэ киирдэ.
Санатан эттэххэ, Виктор Лебедев куоракка Үтүө санаа сылын чэрчитинэн ыытыллар “Үтүө санаа эстафетатын” аахсыйатынан, бэс ыйын 1 күнүгэр Хаҥалас бөһүөлэгэр оҕо оонньуур саҥа былаһааккатын тутан үлэҕэ киллэрбитэ. Итиэннэ бэйэтин доҕоругар — “Ганза” эргиэн киинин дириэктэригэр Максим Варакиҥҥа бу бачыымы салгыырыгар эппитэ. Ону толорон, Максим Варакин Сайсарыга саҥа былаһаакканы тутан, оҕолорго бэртээхэй бэлэҕи оҥордо.
Үөрүүлээх дьаһалга куорат баһылыгын ОДьКХ уонна энергетика боппуруостарыгар сүбэһитэ Наталья Демина, Сайсарытааҕы уокурук управлениетын баһылыга Максим Сыромятников, бэтэрээннэр, олохтоохтор кыттыыны ыллылар. Максим Варакин “Үтүө санаа эстафетатын” «Якутцемент» АУо генеральнай дириэктэрэ Алиш Мамедовка туттарда.
Раиса СИБИРЯКОВА, «Саха сирэ» хаһыат, edersaas.ru
