Уус Алданнааҕы сокуоннай саастарын ситэ илик оҕолору реабилитациялыыр кииҥҥэ сааскы сандал бырааһынньыгы, кулун тутар 8 күнүн көрсө — “Сандалы Куо” диэн кыргыттарга аналлаах олус интэриэһинэй куонкурус ыытыллыбыт. Бу туһунан киин дириэктэрэ Сталина Данилова кэпсээтэ.
—Куонкурус олус сэргэхтик барда. Оҕолор бары сэҥээрдилэр. Түөрт кыыс түөрт араас түһүмэххэ күрэстэстэ. Сонун түһүмэҕинэн кыргыттар бэйэлэрэ саамай сөбүлүүр бырааһынньыктарыгар остуол киэргэтэн көрдөрүүлэрэ буолла. Ол курдук, Саҥа дьыл, төрөөбүт күн, ыһыах уонна бу долгуйа күүппүт сааскы бырааһынньыкпыт сандалытын тардан, киэргэтэн көрдөрдүлэр.
Түмүккэ кыргыттар кыраһыабай иһиттээх, киһи эрэ көрөн сөҕөр, хайгыыр мааны сандалытын тардан кэбистилэр.
Куонкурус түмүгэр “Айыллаана Куо” аатын Василина Копырина, “Мичийээнэ Куо” аатын Надя Горохова, “Кэрэчээнэ Куо” Саина Заровняева, “Сандалы Куо” Тамара Сергучева буоллулар. Кыргыттарга бэртээхэй бэлэхтэр, сэртипикээттэр дохсун ытыс тыаһыгар арыаллатан туттарылыннылар. Оҕолор бары бырааһынньыктааҕы тэрээһинтэн олус астыннылар, үөрдүлэр.
Сардаана БАСНАЕВА, “Саха сирэ” хаһыат, edersaas.ru