Кэбээйигэ Сангаар авиапордун сэлиэнньэтигэр тыатааҕы киирбитин, полиция үлэһиттэрэ Кэбээйитээҕи айылҕа харыстабылын иниспиэксийэтиттэн көҥүл ылан бултаатылар.
От ыйын 5 күнүгэр Сангаар бөһүөлэгэр Космическая уулусса 17-с №-дээх дьиэтин таһыгар, тыатааҕы сылдьар диэн айылҕа харыстабылын иниспиэксийэтигэр сайабылыанньа киирбит. Бу туһунан Кэбээйитээҕи айылҕа харыстабылын иниспиэксийэтин салайааччыта Грузных Д.В. иһитиннэрдэ:
— Бөһүөлэк иһигэр тыатааҕы хаама сылдьарын туһунан биһиэхэ олохтоохтор биллэрбиттэрэ. От ыйын 5 күнүгэр тыатааҕыны бултуур 646425 нүөмэрдээх ылыллыбыт көҥүллээх, икки эриэйдэ оҥорбуппут. Тоһуур туруораары сырыттахпытына, 23 чаас диэки тыатааҕы бөх бааҕыгар киирбитин дьон көрөн полицияҕа тыллаабыттар. Ыксаллаах түгэн үөскээбитигэр, биһиги уопсастыбаннай иниспиэктэрбит, полиция майора Овчинников тыатааҕыны ыппыта. 200 киилэлээх, 20-чэ саастаах, тииһэ сыппаабыт кырдьаҕас кыыл эбит. Араас ыарыыга бэрэбиэркэлиир сыаллаах, бэтэринээрдэр хаанын анаалыска ылбыттара. Соторутааҕыта өссө биир эһэ киирбитин туһунан биллэрдилэр. Көҥүл ыларга өссө биир хадатаайыстыба ыытыахпыт. Олохтоохтору тыаҕа барымаҥ диэн сэрэтэбин. Киһи олоҕор аччык кыылы сэргэ, буола турар тыа баһаара эмиэ кутталлаах.
Кэнники сылларга тыатааҕы дьон олорор сирин таһыгар сылдьара элбээбитэ бэлиэтэнэр. Ойуур баһаарыттан куотаннар, бөһүөлэктэргэ чугаһыыллар.
Николай ПОПОВ, «Саха сирэ» хаһыат, edersaas.ru