Балаҕан ыйын 23 күнүгэр алтыс төгүлүн ыытыллар Москватааҕы марафоҥҥа 30 тыһыынчаттан тахса киһи кыттарын биллэрдэ. Быһыйдар классическай марафоҥҥа (42,195 км) уонна биир көскө илин-кэлин түсүһүөхтэрэ.
Быйылгыттан бу тэрээһин саҥа таһымҥа тахсар. Арассыыйаҕа ыытыллар күрэстэртэн Москватааҕы марафон эрэ аан дойду бөдөҥ марафоҥҥа куоталаһыыларын (Нью-Йорктааҕы, Берлиннээҕи, Чикаготааҕы, Лондоннааҕы, Бостоннааҕы итиэннэ Токиотааҕы) сэргэ аан дойду түһүмэлигэр квалификациялыыр күрэхтэһиинэн буолар. Онон Москватааҕы марафоҥҥа сүүрүктэр көрдөрүүлэрэ саҥа систиэмэнэн бэлиэтэниэхтэрэ.
Норуоттар икки ардыларынааҕы күрэс иитинэн классическай марафоҥҥа Арассыыйа Кубога ыытыллыаҕа. Онно дойду күүстээх уһунньуттара: Татьяна Архипова, Сардаана Трофимова, Степан Киселев, Дмитрий Сафронов уо.д.а. кыттыахтара.
Санатан эттэххэ, былырыыҥҥы Москватааҕы марафон кыайыылаахтарынан Артем Алексеев уонна Сардаана Трофимова буолбуттара. Онно биир дойдулаахпыт трасса саҥа рекордун олохтообута — 2:30.29.
Роман Попов, edersaas.ru
Хаартыска Интэриниэттэн ылылынна.