Бу нэдиэлэттэн саайтпытыгар “Нэдиэлэ Кэрэ Куота” диэн рубрика арыйабыт. Бастакы ыалдьыппыт — “Саха Өрөспүүбүлүкэтин Кэрэ Куота – 2017” куонкуруска “Мисс Интеллект” анал аат хаһаайката, эдэр урбаанньыт Сардана Порядина.
Кэрэ Куобут блиц-ыйытыкка эппиэттиир:
— Иллэҥ кэмҥэр тугу гынаҕын?
— Күннээҕи үлэм, түбүгүм быыһыгар соло буллум даҕаны чугас дьоммун, дьиэ кэргэммин кытта атаара сатыыбын. Маннык кэм миэхэ — олус күндү.
— Ааһан эрэр нэдиэлэҕэ саамай күлбүт-үөрбүт түгэниҥ?
— Дьүөгэлэрим араас мүччүргэннээх сырыыларыттан күлбүтүм.
— Зодиак бэлиэлэригэр итэҕэйэҕин дуо?
— Мин бэлиэм – Кыыс, майгым-сигилим бу бэлиэ ойуулааһыныгар барсыбат, онон итэҕэйбэппин.
— Ааҕааччыларбытыгар ханнык үс сериалы уонна биир киинэни көрөллөрүгэр сүбэлиэҥ этэй?
— Сериаллары бу диэн көрбөппүн, биир даҕаны сериалы саҕаланыаҕыттан бүтүөр диэри көрө иликпин. Бириэмэни олус ылаллар. “Поиск” диэн киинэни сүбэлиибин.
— Спордунан дьарыктанаҕын дуо?
— Нэдиэлэҕэ үстэ фитнескэ уонна буоксаҕа сылдьабын, спорду таптыыбын.
— Олоххор саамай өйдөөн хаалбыт түгэниҥ?
— Оннук түгэн олус элбэх этэ, чопчу бу диэн биири иилэн ылбаппын.
— Тугу талыаҥ этэй: бигэ дуу, биир кэм уларыйа сылдьар туругу дуу?
— Уларыйыылары! Тоҕо диэтэххэ, олоххо буолар үчүгэйдэр барыта соһуччу уларыйаллар, кэми кэтэспэттэр.
— Олоххор саамай соһуччу уонна толкуйдаабакка оҥорбут быһыыҥ?
— Мин үрдүктэн наһаа куттанабын, ол эрээри, этэргэ дылы, “комфорт зонатыттан” тахсан, вышкаҕа ыттыбытым. Билигин үрдүктэн куттаммаппын.
— Олоҕуҥ бүтэһик чааһын хайдах атаарыаҥ этэй?
— Төрөппүттэрбин кытта.
— Бэйэҕэр эрэллээх киһигин дуо?
— Эрэллээхпин, бэйэм кыахпын билэбин.
edersaas.ru